निर्णय नं. ३७७० - ईसाई मत प्रचार

निर्णय नं. ३७७०    ने.का.प. २०४६      अङ्क ३

 

संयुक्त इजलास

माननीय न्यायाधीश श्री गजेन्द्रकेशरी बास्तोला

माननीय न्यायाधीश श्री महेशरामभक्त माथेमा

सम्वत् २०४४ सालको फौ.पु.नं. ४१०

फैसला भएको मिति : २०४६।२।९।२ मा

पुनरावेदक/प्रतिवादी : भारत सिक्कीम घर भई हाल ललितपुर नगरपञ्चायत वडा नं. २ झम्सिखेलमा डेरा गरी बस्ने निकानोर तामाङ

विरुद्ध

विपक्षी/वादी : प्रहरी प्रतिवेदनले श्री ५ को सरकार

मुद्दा : ईसाई मत प्रचार

(१)    कागजात लगायतका सरजमीनका व्यक्तिहरुले आरोपित कसूर गरेको कुरालाई समर्थन गरी बकपत्र समेत गरेको आधारमा निवेदकलाई कसूरदार ठहर्‍याई गरेको फैसला उपर पुनरावेदनको अनुमतिको निवेदन पर्दा निवेदकहरुले आराधना मण्डली खोली कोठाभित्र आराधना गरेको भन्ने देखिन आएको प्रचार प्रसार गरेको हो भन्ने तथ्ययुक्त आधार नदेखिएको भन्ने आधारमा अनुमति प्रदान गरेको यस अदालत संयुक्त इजलासको आदेशसंग उपर्युक्त स्पष्ट प्रमाणको आधारमा यो इजलास सहमत हुन सकेन । पुनरावेदक प्रतिवादीले क्रिश्चियन (इसाई) धर्मको प्रचार गरी हिन्दू धर्मबाट क्रिश्चियन (इसाई) धर्म परिवर्तन गरेको समेत दुवै अपराध गरेको ठहर्‍याएको शुरु अदालतको इन्साफ सदर गरेको क्षेत्रीय अदालतको इन्साफ मनासिब ठहर्ने।

(प्रकरण नं. २२)

विपक्षी/वादी तर्फबाट : विद्वान सहन्यायाधिवक्ता श्री बलराम के.सी.

फैसला

न्या.गजेन्द्रकेशरी बास्तोला

१.     मध्यमाञ्चल क्षेत्रीय अदालतको फैसला उपर पुनरावेदनको अनुमति पाई पेश हुन आएको प्रस्तुत मुद्दाको संक्षिप्त विवरण र निर्णय यस प्रकार छ ।

२.    सिक्किम निवासी निकानोर तामाङले ललितपुर दमकल सेन्टमेरिज स्कूल जाने बाटोमा एउटा घर बहालमा लिई अशिक्षित हिन्दू नागरिकलाई हिन्दू धर्मबाट इसाई धर्ममा परिवर्तन गराउन रुपैयाँ र कपडाको लोभ देखाएर धर्म परिवर्तन गर्ने गरेको हुँदा उचित कानुनी कारवाही होस भन्ने समेत व्यहोराको बेनामी उजूरी ।

३.    नेपालमा आई म निकानोर, दीर्घराज भट्ट, सामुयल शर्मा भई ०३५ सालदेखि पुल्चोकको नाम थाहा नभएको महर्जनको घरमा बसी आराधना मण्डली खोली ०३७ सालदेखि लगातार इसाई मत प्रचार प्रसार गर्दे आएको छु । इसाई मत प्रचार प्रसार गर्न हुँदैन भनी जिल्ला प्रशासकले सम्झाएका थिए । इसाई मत प्रचार प्रसार सम्बन्धी कागज सामग्री मैले भाडामा लिएको महर्जनको घरमा राखेको छ । इसाई मत प्रचार गर्न कुनै स्वीकृति प्राप्त गरेको छैन । बिना थुलुङ र चन्द्र नेपाली बीच क्रिस्टीय विधिपूर्वक विवाह गराई दिएको छु भन्ने समेत व्यहोराको प्रतिवादी निकानोर तामाङको प्रहरीमा गरेको ततिम्बा सहितको बयान कागज ।

४.    म नेपालभित्र हिन्दू जातिमा जन्मिएको नेपाली हुँ । मैले हिन्दू धर्म मानी आएको थिएँ । म २०३३ साल मा भारतको दिल्लीमा गई त्यहाँ रहँदा बस्दा हिन्दूबाट इसाई भएँ । आजभन्दा ४–५ वर्ष पहिले काठमाडौं आई ललितपुरको झंसिखेलमा डेरा लिई बस्न थाले, जुन घरमा निकानोर पनि बस्ने गरेका रहेछन् । निकानोरले रु. ८००।– दिन्छु इसाई मतको प्रचार गर्ने काम गर भनेकाले म पनि निजसंग इसाई मत प्रचार गर्न थालें । पुल्चोकमा के.एल. महर्जनको घर भाडामा लिई आराधना भवनको बोर्ड राखी इसाई मत प्रचार गर्ने गरेको हुँ । आराधना मन्दिर भन्ने संस्था खोल्न कुनै सरकारी कार्यालयबाट स्वीकृति प्राप्त गरेको छैन । मैले आफ्नो हिन्दू जातिमा चलिआएको धर्म परिवर्तन गरी इसाई धर्म लिएकोमा र नेपालभित्र हिन्दू धर्ममा खलल हुने गरी इसाई मत प्रचार गरेकोमा कानुनले जो ठहर्छ भन्ने समेत व्यहोराको प्रतिवादी दीर्घराज भट्टले प्रहरीमा गरेको बयान कागज ।

५.    म हिन्दू धर्मावलम्बी ब्राम्हण कुलमा जन्मिएको हुँ । मैले आजभन्दा १४ वर्ष पहिले देखि आफ्नो हिन्दू धर्मलाई त्यागी धर्म परिवर्तन गरी इसाई धर्म लिई मानी आएको छु । इसाई धर्मप्रति मेरो विश्वास भएको हुँदा आफ्नो धर्म परिवर्तन गराएको हुँ । म निकानोर र दीर्घराज समेत भई पुल्चोक बस्ने के.एल. महर्जनको घर भाडामा लिई सो घरमा आराधना मण्डली खोली मानिस जम्मा गराई इसाई धर्म सम्बन्धी प्रवचन सुनाई इसाई मत प्रचार गर्ने गरी आएका छौं । कानुनले जो ठहर्छ भन्ने समेत व्यहोराको प्रतिवादी सामुयल शर्मा भन्ने सुमनकुमार शर्माले प्रहरीमा गरेको बयान कागज ।

६.    अभियुक्त निकानोर समेतका व्यक्तिले प्रलोभन देखाई आराधना मण्डली भन्ने संस्था खोली इसाई मत प्रचार गरी हिन्दू धर्ममा खलल पारेका हुन् भन्ने समेत व्यहोराको सरजमीन मुचुल्का।

७.    संकलन हुन आएका जाहेरी दर्खास्त अभियुक्तहरुको बयान कागज बरामद भई आएका कागजातहरु एवं दशीका मालसामान सरजमीन मुचुल्का समेतका सबूद प्रमाणबाट विरुद्ध खण्डमा लेखिएका अभियुक्तहरुले नेपालभित्र हिन्दू जातीमा चलिआएको धर्ममा खलल हुने गरी इसाई मत प्रचार गरेको र अभियुक्तहरुमध्ये सामुयल शर्मा भन्ने सुमनकुमार र दीर्घराज भट्ट समेतले आफू नेपालभित्र हिन्दू जातीय ब्राम्हण कुलमा जन्मिएको हिन्दू धर्मावलम्बी भई आफ्नो जातीय हिन्दू धर्मलाई त्यागी इसाई धर्म लिई धर्म परिवर्तन गरी इसाई धर्म लिएको समेत सिद्ध हुन आएकाले अभियुक्त निकानोर तामाङले मुलुकी ऐन अदलको महलको १ नं. विपरीत नेपाल भित्र हिन्दू जातिमा चलिआएको धर्ममा खलल हुने गरी इसाई मत प्रचार गरेकाले निजलाई सोही अदलको महलको १ नं. अनुसार र अभियुक्त सामुयल शर्मा भन्ने सुमनकुमार शर्मा र दीर्घराज भट्ट समेतले अदलको १ नं. विपरीत आफ्नो हिन्दू धर्म त्यागी धर्म परिवर्तन गरी इसाई धर्म लिएकोमा र नेपालभित्र हिन्दू जातिमा चली आएको धर्ममा खलल हुने गरी इसाई मत प्रचार गरेकोमा समेत निजहरुलाई सोही अदलको महलको १ नं. बमोजिम कारवाही र सजायँ हुन अनुरोध छ भन्ने समेत व्यहोराको प्रहरी प्रतिवेदन ।

८.    प्रहरीमा गरेको बयान मेरो खुसीराजीको नभई डर त्रास देखाई सो बयानमा सहिछाप गराएका हुन । म क्रिश्चियन भएको हुनाले मलाई क्रिश्चियनहरुको भजन र उनीहरुको संस्था भेटेपछि म पनि क्रिश्चियन भएँ । ६ वर्ष भयो फिटर राजन भन्ने भारतको एकजना व्यक्तिले यशुको बारेमा कथा सुनाए र मलाई यशुले क्रिश्चियन बनाए । मैले अरु कुनै नेपाली हिन्दू धर्मावलम्बीहरुलाई क्रिश्चियन धर्ममा लगाई धर्म परिवर्तन गरे गराएको छैन भन्ने समेत व्यहोराको प्रतिवादी दीर्घराज भट्टको अदालतमा भएको बयान ।

९.    प्रहरीको बयान मेरो स्वेच्छाले भएको होइन लेखी राखेको कागजमा जबर्जस्त सहिछाप गराएको हो । मेरो जन्म २००७ सालमा गौतम परिवारमा भएको हो मेरा आमा बाबु म १० वर्ष हुँदासम्ममा नै परलोक हुनु भएबाट तानसेन अस्पतालका डाक्टर जेसिज पेडले भन्ने व्यक्तिले मलाई सानै उमेर देखि हेरविचार शिक्षा दिक्षा गरी आउनु भएको र वहाँको भनाई अनुसार मेरा माता पिता इसाई धर्म मान्ने गर्नु हुन्थ्यो र मैले पनि इसाई धर्म मानी आएको हुँ हिन्दू धर्ममा खलल पारी मैले इसाई धर्म प्रचार प्रसार गरे गराएको छैन । आराधना भवनमा हामी क्रिश्चियनहरु मात्र जम्मा भई आराधना प्रार्थना गरी आएको हो । अरु कुनै नेपालीलाई इसाई धर्ममा ल्याएको होइन छैन भन्ने समेत व्यहोराको प्रतिवादी सामुयल शर्मा भन्ने सुमनकुमार शर्माको अदालतमा भएको बयान ।

१०.    म समेतका क्रिश्चियन साथीहरु मिलेर पुल्चोकमा घर भाडामा लिई सबै क्रिश्चियनहरु भेला जम्मा भई प्रार्थना गर्ने गरेका हौं । दावी अनुसार नेपाली जनतालाई भेला जम्मा गराई इसाई धर्म प्रचार गरेको होइन भन्ने समेत व्यहोराको प्रतिवादी निकानोर तामाङले अदालतमा गरेको बयान ।

११.    प्रतिवादी निकानोर तमाङले प्रहरीमा बयान गर्दा हिन्दू धर्ममा खलल हुने गरी इसाई धर्म प्रचार गरेको हुँ भनी लेखाएको र बुझिएका सरजमीनका कृष्णचन्द्र र मोहनबहादुर समेतले प्रतिवादी निकानोर समेतले हिन्दू धर्ममा खलल हुने गरी धर्म प्रचार गरेको हो भनी बकपत्र गरी दिएका र बरामद भई आएका ६ अगस्त १९८२ को पत्रहरु समेतको सार अनुसार नेपालमा निज  प्रतिवादी निकानोरले इसाई धर्म प्रचार गरेको देखिँदा निज प्रतिवादी निकानोरलाई अदलको १ नं. ले दावी बमोजिम सजायँ हुने देखियो । प्रतिवादी सामुयल शर्माले धर्म प्रचार गरेको भन्ने प्रत्यक्ष सबूद वादी पक्षले देखाउन पनि नसकेको प्रहरीमा भएको साविती बयानलाई समर्थन गर्ने प्रत्यक्ष प्रमाणको अभावमा निजले धर्म प्रचार गरेको भन्न मनासिब नहुँदा त्यसतर्फ वादी दावी पुग्ने अवस्थै परेन । आफू पहिले हिन्दू भएको र अन्य क्रिश्चियनको प्रभावबाट हिन्दूबाट क्रिश्चियन धर्म परिवर्तन गरेमा सावितै हुँदा धर्म परिवर्तन गरेतर्फ मात्रै निज सामुयल शर्मालाई सजायँ हुने देखियो । प्रतिवादी दीर्घराज भट्टले धर्म प्रचार गरेको भन्ने सम्बन्धमा कुनै सबूद प्रमाण नआउनुको साथै धर्म परिवर्तन विदेश भारतमा गरेको भन्ने बयानकै आधारमा दावी आएको र त्यस्तो विदेशमा भएको काम कारवाहीमा यहाँ सजायँ गरी रहन आवश्यक नदेखिँदा निज दीर्घराजले सफाई पाउने ठहर्छ भन्ने समेत व्यहोराको ललितपुर जिल्ला अदालतबाट मिति २०४२।१।२६ मा भएको फैसला ।

१२.   ललितपुर जिल्ला अदालतले प्रतिवादी सामुयल भन्ने सुमन शर्मालाई इसाई धर्म प्रचार गरेको ठहर्‍याएको र दीर्घराज भट्टलाई सफाई दिने गरेको हदसम्मको फैसलामा चित्त बुझेन निजहरु दुवैजना प्रतिवादीहरुलाई माग दावी अनुसार सजायँ हुन अनुरोध छ भन्ने समेत व्यहोराको वादी श्री ५ को सरकारतर्फबाट मध्यमाञ्चल क्षेत्रीय अदालतमा पर्न आएको पुनरावेदनपत्र ।

१३.   मलाई ६ वर्ष कैद गर्ने गरी ललितपुर जिल्ला अदालतबाट भएको फैसलामा चित्त बुझेन । उक्त फैसला बदर गरी झुठ्ठा दावीबाट सफाई पाउँ भन्ने समेत व्यहोराको प्रतिवादी निकानोर तामाङको मध्यमाञ्चल क्षेत्रीय अदालतमा पर्न आएको पुनरावेदनपत्र ।

१४.   ललितपुर जिल्ला अदालतले धर्म परिवर्तन गरेको ठहर्‍याई मलाई १ वर्ष कैद गर्ने गरी गरेको फैसला बदर गरी पूर्णरुपले सफाई पाउँ भन्ने समेत व्यहोराको प्रतिवादी सामुयल भन्ने सुमन शर्माको मध्यमाञ्चल क्षेत्रीय अदालतमा पर्न आएको पुनरावेदनपत्र ।

१५.   प्रतिवादी मध्येका दीर्घराज भट्टलाई सफाई दिई निकानोर तामाङले क्रिश्चियन (इसाई) धर्म प्रचार गरी धर्म परिवर्तन गराएको ठहर गरी सजायँ गरेको इन्साफ मनासिब ठहर्छ प्रतिवादी सुमन शर्माले अधिकार प्राप्त अधिकारी समक्ष भएको मुख सावितीलाई इन्कार गरी आफू १० वर्षको हुँदा बाबु आमा परलोक भएका र आफूलाई पालन पोषण गर्नेले मेरा बाबु आमा क्रिश्चियन धर्मावलम्बी हुन् भनी आफूलाई उक्त धर्ममा लगाएकोले लागी आएको भनी बयान गरेबाट सुमन शर्मालाई धर्म परिवर्तन गरेको कायम गरी सजायँ गर्ने गरेको हदसम्मको शुरु ललितपुर जिल्ला अदालतको फैसला नमिली उल्टी हुने ठहर्छ भन्ने समेत व्यहोराको मध्यमाञ्चल क्षेत्रीय अदालतको मिति ०४४।१।८।३ को फैसला ।

१६.    नेपालको संविधानको धारा १४ ले आफ्नो धर्म अवलम्बन गर्न पाउने मौलिक हकको किटानी व्यवस्था गरेको छ । अर्काको धर्म परिवर्तन गराई लैजान मात्र नपाउने बन्देज छ । उक्त प्रत्याभूत मौलिक हकको मैले उपभोग गरेको छु । तर अरु कसैलाई मैले धर्म परिवर्तन गराएको छैन र हिन्दू जातिमा चली आएको मतलाई खलल हुने गरी इसाई मत प्रचार गरेको छुइन । धर्म समितिको रुपमा मैले कुनै संस्था संचालन गरेको छैन । आराधना मण्डलीका सदस्यहरु इसाई धर्म प्रचार गरेर बढे बढाएको पनि नहुँदा मलाई सो अभियोग ठहर गरी गरेको फैसलामा संविधानको व्याख्या समेतमा गम्भीर कानुनी त्रुटि हुँदा पुनरावेदनको अनुमति पाउँ भन्ने समेत व्यहोराको प्रतिवादी निकानोर तामाङको यस अदालतमा पर्न आएको पुनरावेदनपत्र ।

१७.   यस्मा निवेदकले आराधना मण्डली खोली कोठाभित्र आराधना गरेको भन्ने देखिन आएको छ । नेपालभित्र हिन्दू जातिमा चली आएको धर्ममा खलल पर्ने गरी प्रचार प्रसार गरेको हो भन्ने तथ्ययुक्त आधार नदेखिई निजलाई कसूरदार ठहर्‍याउन नमिल्नेमा कसूरदार ठहर्‍याएको फैसलामा अदलको १ नं. को व्याख्या सम्बन्धी त्रुटि देखिनाले पुनरावेदनको अनुमति दिइएको छ भन्ने समेत व्यहोराको यस अदालत संयुक्त इजलासको मिति ०४४।३।३०।३ को आदेश ।

१८.   नियम बमोजिम दैनिक पेशीमा चढी पेश हुन आएको प्रस्तुत मुद्दामा प्रत्यर्थी वादी श्री ५ को सरकारतर्फबाट उपस्थित हुनुभएका विद्वान सहन्यायाधिवक्ता श्री बलराम के.सी. ले गर्नुभएको बहस समेत सुनी मध्यमाञ्चल क्षेत्रीय अदालतले गरेको इन्साफ मिले नमिलेको के रहेछ सो विषयमा निर्णय दिनु पर्ने हुन आयो ।

१९.    यसमा प्रतिवादी निकानोर तामाङले आफू भारत नयाँबजार गान्टोक सिक्किम निवासी क्रिश्चियनको पुजारी (पाष्टर) भएको र ललितपुर जिल्ला स्थित झंसिखेल गणेश स्थानको छेउमा कृष्णनाथ शर्माको घरमा बसी आराधना मण्डल खोली क्रिश्चियन मत अनुसार प्रार्थना गर्ने र सो धर्म सम्बन्धी प्रवचन दिंदै आएको र क्रिश्चियन धर्मावलम्बी हुँ भनी केटाकेटी मन्जूर साथ विवाह गराई माग्न आए नेपाली केटाकेटीहरुलाई पनि क्रिश्चियन धर्म अनुसार विवाह गराई प्रमाणपत्र समेत दिंदै आएका छौं भनी अदालत समक्ष बयान गरेका छन् ।

२०.   यी पुनरावेदकले क्रिश्चियन (इसाई) धर्म सम्बन्धी प्रवचन दिन खोलिएको आराधना मण्डलमा राखिएका क्रिश्चियन धर्म प्रचार सम्बन्धी बरामदी मुचुल्काको तपसील खण्डमा उल्लेख गरिएका कागजात लगायतका सरसामानहरुलाई यी पुनरावेदकले हाम्रो मण्डलीको हो भनी अदालतको बयानको सवाल १३ को जवाफमा व्यक्त गरेको हुँदा सामानहरु बरामद भएको र सो सामानहरु क्रिश्चियन (इसाई) धर्म प्रचार प्रसार सम्बन्धी हुन् भन्ने कुरामा विवाद देखिँदैन । बरामद भएका कागजातहरु मध्ये दिलिप थापाले “धन्यवाद टक्रयाउँछु धर्म गुरुलाई विशेष, मलाई धर्म परिवर्तन गरी ख्रिष्टेन जीवनमा प्रवेश गर्नको लागि सहायता गर्नुभएकोमा । आज देखि म तपाईको मण्डली देखि छुट्दैछु आजदेखि म मेरो जीवन आफैं जिम्मेवारी हुन्छु मलाई प्रभुले अगुवाई गरेमा म केही स्थानीय मण्डली गई संगीत गर्नेछु तपाई धर्म गुरुज्यूलाई धन्यवाद दिन्छु” भनी लेखेको र रेमण्ड समेतले पुनरावेदकलाई १९ मे १९८३ मा लेखेको पत्रमा It is encouraging to us to know that the lord has been leading you through many persecution, and as a result you have gained spritual strength." भनी लेखेको पाइन्छ । त्यस्तै ६ अगस्त ८२ मा यी पुनरावेदक निकानोर तामाङले पुतलीसडक चर्च काठमाडौंलाई लेखेकोपत्रमा “Ever since the Lord helped us to establish Aradhana Mandali in patan area our heart always went to Kathmandu city to witness to those who have never heard about the Lord Jesus Christ. We are contacting some new people in the city but due to distance they are not able to come to our Church. It would be really wonderful if we could work with Putalisadak Church and bring our people to the Church in the city." भनी लेखिएको समेतबाट यी पुनरावेदक।प्रतिवादीले नेपाली जनताहरुलाई भेला जम्मा गराई इसाई धर्म प्रचार गरेको होइन, म समेतका क्रिश्चियन साथीहरु मिलेर शनिवार भेला जम्मा भई प्रार्थना गर्ने गरेका हौं । जाहेरी बमोजिम मैले नेपालीहरुलाई हिन्दू धर्म परिवर्तन गराई इसाई धर्म प्रचार प्रसार गरेको होइन भनी अदालत समक्ष गरेको बयान विश्वासलायक देखिएन ।

२१.   सरजमीनको व्यक्तिहरुले यी पुनरावेदक । प्रतिवादीहरु समेतले आराधना मण्डली खोली बाइबलको शिक्षा र इसाई धर्म सम्बन्धी प्रवचन दिई क्रिश्चियन (इसाई) धर्मको प्रचार प्रसार गरेका हुन् भनी सरजमीनमा लेखाई दिएका र सरजमीनमा बस्ने चन्द्रकृष्ण महर्जनले यी प्रतिवादीले हरेक हप्ता आराधनाको समयमा आराधना मण्डलमा आएको देखेकोले चिन्दछु । आफू आराधना मण्डलीमा नेपाली दाजुभाइहरु गएको र नबुझिने किसिमले भजन गरेको मेरो कौसीबाट सुनेको छु, भित्र के के गर्छन थाहा छैन भनी बकपत्र गरेका र सरजमीनका अर्का मोहनबहादुरले पनि सरजमीनमा लेखिएको व्यहोरालाई समर्थन गर्दै बकपत्र गरेको पाइन्छ ।

२२.   मुलुकी ऐन अदलको महलको १ नं. मा “हिन्दू जातिमा चली आएको धर्ममा खलल हुने गरी इसाई, इस्लाम इत्यादी मतहरु कसैले प्रचार गर्न वा सो मतहरुमा हिन्दू धर्मका कसैको धर्म परिवर्तन गराई लैजान हुँदैन सो कुराको उद्योगसम्म गरेमा तीन वर्ष कैद र काम गरिसकेकोमा ६ वर्ष कैद गरी विदेशी नागरिक रहेछ भने नेपाल बाहिर निकाला समेत गरी दिनु पर्छ । हिन्दू धर्मका कसैले आफ्नो मत परिवर्तन गरी माथि लेखिएको कुनै धर्म लिएमा निजलाई एक वर्षसम्म कैद गरी विदेशी नागरिक रहेछ भने नेपाल बाहिर निकाला गरी दिनुपर्छ । धर्म परिवर्तन गर्ने उद्योगसम्म गरेकोमा एकसय रुपैयाँ जरिवाना हुन्छ । धर्म परिवर्तन भएकोमा सो बदर भई यस्तो व्यक्ति आफ्नो हिन्दू धर्ममा नै रहन्छ” भन्ने उल्लेख भएकोबाट यी पुनरावेदक प्रतिवादी निकानोर तामाङले क्रिश्चियन (इसाई) धर्मको प्रचार गरी हिन्दू धर्मबाट क्रिश्चियन (इसाई) धर्म परिवर्तनको अपराध नगरेको भन्ने कुरामा शंकासम्म पनि देखिन आउँदैन । माथि उल्लेखित कागजात लगायतका सरजमीनका व्यक्तिहरुले आरोपित कसूर गरेको कुरालाई समर्थन गरी बकपत्र समेत गरेको आधारमा निवेदकलाई कसूरदार ठहर्‍याई गरेको फैसला उपर पुनरावेदनको अनुमतिको निवेदन पर्दा निवेदकहरुले आराधना मण्डली खोली कोठाभित्र आराधना गरेको भन्ने देखिन आएको प्रचार प्रसार गरेको हो भन्ने तथ्ययुक्त आधार नदेखिएको भन्ने आधारमा अनुमति प्रदान गरेको यस अदालत संयुक्त इजलासको मिति ०४४।३।३०।३ को आदेशसंग उपर्युक्त स्पष्ट प्रमाणको आधारमा यो इजलास सहमत हुन सकेन । पुनरावेदक प्रतिवादी निकानोर तामाङले क्रिश्चियन (इसाई) धर्मको प्रचार गरी हिन्दू धर्मबाट क्रिश्चियन (इसाई) धर्म परिवर्तन गरेको समेत दुवै अपराध गरेको ठहर्‍याएको शुरु ललितपुर जिल्ला अदालतको इन्साफ सदर गरेको मध्यमाञ्चल क्षेत्रीय अदालतको इन्साफ मनासिब ठहर्छ । सो ठहर्नाले शुरुले प्रतिवादी निकानोर तामाङलाई गर्ने गरेको कैद वर्ष ६।.।. को सयकडा ५% ले तीन महीना उन्नाइस दिन थप कैद हुन्छ । लगत कसी असूल गर्न शुरु ललितपुर जिल्ला अदालतमा लगत दिई नियमानुसार गरी मिसिल बुझाई दिनु ।

 

उक्त रायमा म सहमत छु ।

 

न्या.महेशरामभक्त माथेमा

 

इति सम्वत् २०४६ साल ज्येष्ठ ९ गते रोज २ शुभम् ।