निर्णय नं. ४२११ - कर्तव्य ज्यान

निर्णय नं. ४२११     ने.का.प. २०४७           अङ्क १०

 

संयुक्त इजलास

सम्माननीय प्रधान न्यायाधीश श्री धनेन्द्रबहादुर सिंह

माननीय न्यायाधीश श्री बब्बरप्रसाद सिंह

सम्वत् २०४७ सालको फौ.सा.नं. ४४

फैसला भएको मिति: २०४७।९।१७।३ मा

वादी : प्र.ह.अवधराम यादवको जाहेरीले श्री ५ को सरकार

विरुद्ध

प्रतिवादी: जि.गुल्मी बाझकटेरी गा.वि.स. वा.नं. ८ बस्ने पुतली मगर्नी

मुद्दा : कर्तव्य ज्यान

(१)   विवाहित लोग्ने बाहेकका पर पुरुषसंगको अनुचित सम्बन्धबाट गर्भ रहन गई जन्मेको जातक बच्चालाई अरुले देखे थाहा पाए बेइज्जत हुन्छ भन्ने लागी लोकापवादबाट मुक्त हुन नवजात शिशुलाई कर्तव्य गरी मारेको भन्ने देखिँदा घटी सजायँको लागि क्षेत्रीय अदालतले लगाएको राय मनासिब देखिँदा अपराध गर्दाको अवस्थाको विचारबाट समेत प्रतिवादीलाई ज्यानसम्बन्धीको १३(३) नं. का ऐन बमोजिम सर्वश्वसहित जन्मकैद गर्दा चर्को पर्ने देखिन आएकोले निज प्रतिवादीलाई अ.बं. १८८ नं. बमोजिम कैद वर्ष ५ पाँच मात्र सजायँ हुने ।

(प्रकरण नं. २१)

फैसला

प्र.न्या.धनेन्द्रबहादुर सिंह

१.     पश्चिमाञ्चल क्षेत्रीय अदालतले साधक निकासाको लागि जाहेर गरेको प्रस्तुत मुद्दाको तथ्य यस प्रकार छ :–

२.    जंगबहादुरकी छोरी पुतली भन्नेले मिति २०४३।२।२० गते छोरो पैदा गरी २१ गते विहान मारी घरमुनी मकैवारीमा लगी खाल्टो खनी गाडेकी र छिमेकी यमकुमारी घर्ती र छवी कमिनी बच्चा पाउने बेलामा भएका पुतलीको गर्भबाट पैदा भएको छवि कमिनीले देखेकी भन्ने हल्ला भई रिपोर्ट पर्न आएको के कसो हो सो ठाउँमा पुगी लाश समेत फेला पारेकोले डोर खटाई पाउँ भन्ने मिति २०४३।२।२४ गतेको अवधरामको प्रतिवेदन ।

३.    लाश खाल्डोबाट निकाली हेर्दा आँखा बन्द रहेका मुख खुल्ला रहेको नाक मुख र आँखा किरा परेको आँखा नाक मुखबाट रगत निस्की किरा परेको लिंगमा किरा परेको नाइटो लामो भएको र सो नाइटोमा सेतो धागो बाँधिएको किरा परी सकेकोले लाश निकै दुर्गन्ध भएको भन्ने समेत शेरबहादुर झाँक्री समेतले गरी दिएको मिति २०४३।२।२६ गतेको लाश प्रकृति मुचुल्का ।

४.    छोरी पुतली मेरै घरमा बसी आएको छ र निजले गर्भ बोकेको कुरा थाहा भएन । मिति २०४३।२।१८ गतेमा लोग्ने जंगबहादुर तम्घास गई मिति २०४३।२।२१ गते घरमा गएको हो । ऐजन २३ गते छवि कमिनी र यमकुमारीले पुतलीले छोरा पाइछ भन्ने कुरा गरेकीले थाहा पाएँ । जनता भेला भएपछि खार खेर गर्दा छोरा जन्माई कर्तव्य गरी मारी मकैं वारीमा गाडेको कुरा बताएको हो भन्ने समेत पुतलीको आमा कलि झाक्रीले प्रहरी डोरमा मिति २०४३।२।२६ गतेमा गरेको ठाडो कागज ।

५.    मिति २०४३।२।२० गते म पुतलीको घरमा साग माग्न गएको अवस्थामा पुतली घर भित्र उपल्लो चौकामा सुतेकी थिइन म पनि निजकै कोठामा गई बसे । त्यसैबेला बच्चा बोलेको चाल पाई के हो भन्ने सोद्धा छोरा हो कतिखेर जन्मियो भन्दा दिउँसो तिर हो नाल पनि काटी सके भनिन् र मैले पनि थाङना सितै बच्चा देखेकी हुँ साँझ पर्न लागेकोले म घर आएँ यी कुरा कतै नभन्नु भनेकी हुन् मैले पुतलीले छोरा पाइछ भनी गाउँमा कुरा गरेकी हुँदा पुतलीले कसको गर्भ बोकिन र किन मारीन थाहा छैन, भन्ने समेत व्यहोराको यमाकुमारी घर्ती मगरले मिति २०४३।२।२६ गतेमा प्रहरी डोरमा गरेको ठाडो कागज ।

६.    लाश सडी गली सकेकोले पोष्टमार्टम गराउने स्थिति नभएको भन्ने रामबहादुर पाण्डे समेतले गरी दिएको मिति २०४३।२।२७ गतेको मुचुल्का र लाश पोष्टमार्टम गर्न डाक्टर नभएकोले पोष्टमार्टम हुन नसक्ने भन्ने तम्घास अस्पतालको मिति २०४३।२।२७ गतेको पत्र सहित पोष्टमार्टम फाराम फिर्ता आएको निजले केही दिन अघि नवजात बच्चा जन्माएको देखिन्छ, भन्ने नि.मे.अ. को मिति २०४३।२।२७ गतेको राय ।

७.    २०४२ सालको भाद्र महीनाको कृष्ण जन्माष्टमीको पर्वमा पुर्कोटमा रमिता लागेकोले गएकी थिएँ त्यसभन्दा अघि देखि नै चिना जानी भएका टिमुर खर्क बस्ने सोमे घर्तीसंग भेट भई २ पटक सम्म करणी लेनदेन भयो । म माइती घर आएँ । त्यसै दिनको सोमेको करणी लेनदेनबाट मेरो पेटमा गर्भ रह्यो । २०४२ सालको दशैंको पूर्णिमा पुर्कोटको जात्रामा पनि सोमे क्षेत्रीसंग भेट भई करणी लेनदेन भयो । त्यसरी करणी लेनदेन भई गर्भ रहेको कुरा कसैसंग भनिन । मिति २०४३।२।२० गते मेरो पेटबाट जिउँदो जातक जन्मियो । मैले नै नाल काटे सोमेको गर्भ बोकेको कुरा कसैलाई थाहा नहुँदा कसैले थाहा पाए मेरो बेइज्जत हुन्छ भन्ने मनमा लागी उज्यालो हुने बेलामा वनमा बोकी मकैवारीको पाटामा लगी बच्चाको छातीमा अठ्याई थिची मारी खाल्डो खनी गाडी पुरी घरमा आएकी हुँ, २० गते बेलुका छवि कमिनी गएकी थिई । त्यही अवस्था छोरो जन्मियो । केही समयपछि यमाकुमारी आएकी थिई बच्चा जन्मेको कुरा नभन भनेकी थिएँ निजहरुले गाउँमा हल्ला गरी हिंडेछन् गर्भ बोकेको कुरा सोमेलाई भनिन र निजलाई थाहा थिएन भन्ने समेत व्यहोराको प्रतिवादी पुतली मगरनीले मिति २०४३।२।२८ गतेमा प्रहरीमा गरेको बयान कागज ।

८.    पुतलीको नाठो सोमे नै रहेछ भन्ने लाग्छ इज्जतबाट बच्न जीवित बच्ची पुतलीले मारेको विश्वास लाग्छ मतियार छैन भन्ने शेरबहादुर झाँक्री, पुतलीकै भनाइबाट सोमेको गर्भ बोकी इज्जतबाट बच्न पुतलीले बच्चा मारेमा विश्वास लाग्छ भन्ने चन्द्रबहादुर झाँक्री पुतली आफैं सावित भएकैले आफूले जन्माएको बच्चा इज्जतका लागी मारी गाडेको विश्वास छ, भन्ने डबल सिंह झांक्री, पुतली सावित भएकीले सोमेको अनुचित करणीबाट जन्मेको बालक निजले मारी गाडेको हो भन्ने ठगबहादुर झाँक्री, पुतलीले गर्भ बोकेको कुरा थाहा छैन । पुतलीले मैले मारेकी हुँ भनी लाश देखाएकोले विश्वास लाग्यो भन्ने हीराबहादुर विश्वकर्मा, खिमबहादुर विश्वकर्मा, कुम्मे विश्वकर्मा, लुटे विश्वकर्मा, पुतली सावित भएकोले शंका लाग्छ भन्ने लछुमन खत्री, गोरे दमै, दमलाल भुसाल, पुतली सावित भएकोले मारी गाडेको ठहराएको हो भन्ने जगतबहादुर झाँक्री, नरबहादुर झाँक्री, हर्कबहादुर झाँक्री, बलबहादुर विश्वकर्मा, वोधराज भुसाल पुतलीले जीवित पैदा गरेको छोरा बालक निजले नै कर्तव्य गरी गाडेको विश्वास लाग्छ भन्ने नेत्रप्रसाद भुसाल समेतले गरी दिएको प्रहरीद्वारा भएको मिति २०४३।३।१६ गतेको सरजमीन मुचुल्का ।

९.    प्रतिवादी पुतली मगरनीलाई र सोम क्षेत्रीलाई मुलुकी ऐन ज्यानसम्बन्धीको १३(३) नं. बमोजिम सजायँ गरी पाउँ भन्ने समेत जिल्ला न्यायाधिवक्ता र प्रहरी निरीक्षकको २०४३।३।२० गतेको संयुक्त प्रतिवेदन ।

१०.    जातक पैदा भएको मिति २०४३।२।२० गते हो । जातक जिउँदो जन्मेको हो त्यतिबेला छविकमिनी मेरो घरमा आएकी थिइन । त्यसदिन साँझदेखि मलाई निन्द्रा लागेकोले म निदाए बच्चा छोरो कतिबेला के कारणबाट कसरी मर्‍यो मलाई थाहा भएन । भोलिपल्ट बिहान निन्द्राबाट ब्यूँझदा बच्चा मरी रहेको देखेकी हुँ । मैले कर्तव्य गरी मारेकी छैन । घरमा कोही नहुँदा आफैं लगी गाडेकी हुँ । बच्चा जातक छोरालाई कर्तव्य गरी मारेको छैन । प्रहरीमा कुटपिट गर्छन् भन्ने डरले सावित भए तापनि राजीखुसीबाट भएको हैन मनमौ गा.पं. वडा नं. थाहा छैनमा बस्ने सोमे क्षेत्रीसंग पटक पटक सहवास करणी लेनदेन भई गर्भ रही १० मास पुगी मिति २०४३।२।२० गते जातक छोरा जन्मेको हो । सोमे समेत कसैले मार्न लगाएको समेत होइन । सफाई पाउँ भन्ने समेत व्यहोराको मिति २०४३।३।२० मा प्रतिवादी पुतली मगरनीले अदालतमा गरेको बयान ।

११.    प्रतिवादी पुतली मगरनीलाई मैले देखेकै छैन । निजलाई मैले करणी गरी गर्भ बोकाएको पनि हैन । निजले जातक मिति २०४३।२।२० गते पैदा गरेको पनि छैन । निजले जन्माएको बच्चा मरे नमरेको पनि मलाई थाहा छैन । पुतलीले जन्माएको बच्चा मैले मारे मराएको होइन । पुतलीको काकासंग रिसइवी हुँदा निजले सिकाई पोलेको हो । सफाई पाउँ भन्ने समेतका व्यहोराको प्रतिवादी सोमेबहादुर बोहरा क्षेत्रीले २०४३।४।१६ मा अदालतमा गरेको बयान ।

१२.   मिति २०४३।२।२० गते साँझ पख पुतली कहाँ साग माग्न जाँदा छोरोलाई उपल्लो कुनामा सुताई रहेको देखें । मैले हेर्दा बच्चा जिउँदै थियो । बच्चा कुन समयमा पाई जन्मदा मैले देखिन थाङनोसितै बच्चा देखेकी हुँ । पुतलीले जन्माएको बच्चा कसरी मर्‍यो थाहा छैन भन्ने प्रहरीमा मैले गरेको कागजको व्यहोरा ठीक छ भन्ने यमाकुमारी घर्तीको बकपत्र ।

१३.   मिति २०४३।२।२० गते पुतली कहाँ साग माग्न गएकी थिएँ । आधा दिउँसोको समय हुँदो हो त्यसैबेला पुतलीले बच्चा पाई मैले देखे पुतलीले कसैसंग नभन्नु भनेकी थिई कसरी मर्‍यो थाहा छैन मारेको मैले देखिन । मैले प्रहरीमा लेखाएको व्यहोरा ठीक छ भन्ने छवि कमिनीको बकपत्र ।

१४.   मिति २०४३।२।२० गते पुतलीले बच्चालाई मारेर गाडेकी छ भन्ने २३ गते रिपोर्ट आई घटनास्थलमा जाँदा लाश फेला पर्‍यो । बच्चा जिउँदो जन्मेको थियो भन्ने छवि कमिनी र यमाकुमारीबाट थाहा भएको हो । पुतलीले कर्तव्यबाट मारेको जस्तो लाग्छ मैले मारेको देखेको हैन । पुतलीसंग सोद्धा मारेको हुँ भनी भनेकोले निजले मारेको हुनुपर्छ भन्ने प्रतिवेदन गर्ने प्र.ह.अवधरामको बकपत्र ।

१५.   बच्चालाई मारेकोमा पुतलीले अदालतमा इन्कारी गरेको सरमजीनले शंका लाग्छ भनेका प्रहरीमा भएको बयान अन्य सबूदबाट समर्थित हुन नआएको । प्र.सोमेको हकमा सरजमीनले शंकासम्म देखाएका पुतलीले नपोलेको र निज अदालतमा इन्कार रहेको समेतबाट पुतली मगरनीलाई ज्यानसम्बन्धीको ६ नं. को देहाय (२) अनुसार १ वर्ष कैद र प्रतिवादी सोमेलाई सफाई दिने ठहर्छ भन्ने समेत गुल्मी जिल्ला अदालतको २०४४।२।१४ को फैसला ।

१६.    उक्त फैसलामा चित्त बुझेन प्रतिवादी पुतली मगरनीले प्रतिवादी सोमेको गर्भ बोकी बच्चा जन्माएकोमा स्वीकारोक्ती छ यमाकुमारी सो देख्ने छिन् प्रतिवादी पुतलीले जिउँदो जातक जन्माई छाती थिची मारेकोमा सरजमीनका मानिसले बकी दिएको समेतबाट शुरु फैसला त्रुटिपूर्ण हुँदा प्रहरी प्रतिवेदन माग दावी अनुसार सजायँ गरी पाउँ भन्ने समेत वादी श्री ५ को सरकारको तर्फबाट लुम्बिनी अञ्चल अदालतमा परेको पुनरावेदनपत्र ।

१७.   प्रतिवादी पुतली मगरनीले आफ्नो गर्भबाट जिउँदो नाबालकलाई मारी गाडेको मुलुकी ऐन ज्यानसम्बन्धीको १३(३) नं. बमोजिम सजायँ गर्नु पर्नेमा ज्यान सम्बन्धीको ५ नं. अन्तर्गतको कसूर ठहराई सो बमोजिम गरेको सजायँ त्रुटिपूर्ण हुँदा उल्टी भई निज पुतली मगरनीलाई ज्यानसम्बन्धी १३(३) नं. बमोजिम सर्वश्वसहित जन्मकैद हुने र प्रतिवादी सोमे क्षेत्री भन्ने सोमबहादुर क्षेत्रीलाई सफाई दिएको मनासिब ठहरी शुरु इन्साफ उल्टी हुने ठहर्छ भन्ने समेत व्यहोराको लुम्बिनी अञ्चल अदालतको २०४६।५।२९।५ गतेको फैसला ।

१८.   प्रतिवादी पुतली मगरनीले प्रहरी प्रतिवेदन माग दावी बमोजिमको कसूर गरेकोले निजलाई ज्यानसम्बन्धीको १३(३) नं. लगाई गरेको लुम्बिनी अञ्चल अदालतको इन्साफ मनासिब छ । निजलाई ज्यानसम्बन्धीको १३(३) नं. अन्तर्गतकै सजायँ गर्दा चर्को पर्ने भई अ.बं. १८८ नं. बमोजिम कैद वर्ष ५ गर्ने राय साथ साधक जाहेर गरेको छु भन्ने समेत पश्चिमाञ्चल क्षेत्रीय अदालतको मिति २०४७।३।२५।२ को फैसला ।

१९.    नियम बमोजिम पेश हुन आएको प्रस्तुत मुद्दामा पश्चिमाञ्चल क्षेत्रीय अदालतको इन्साफ मिलेको छ, छैन ? सो कुराको निर्णय दिनु पर्ने हुन आएको छ ।

२०.   यसमा निर्णयतर्फ हेर्दा प्रतिवादी पुतली मगरनी र सोमे क्षेत्रीलाई ज्यानसम्बन्धीको १३(३) अनुसार सजायँ गरी पाउँ भन्ने समेत प्रहरी प्रतिवेदनमा दावी लिएको देखिन्छ । प्रतिवादी मध्येका सोमे क्षेत्री भन्ने सोमबहादुर क्षेत्रीलाई सफाई दिएको शुरुको इन्साफ लुम्बिनी अञ्चल अदालतले सदर गरेतर्फ कसैको पुनरावेदन नपरी अन्तिम रहेकोले विचार गर्न परेन । प्रतिवादी पुतली मगरनीलाई ज्यानसम्बन्धीको १३(३) नं. अनुसार सर्वश्वसहित जन्मकैद गर्ने गरेको लुम्बिनी अञ्चल अदालतको इन्साफ सदर गरी साधक जाहेर गरेतर्फ हेर्दा अभियुक्त पुतली मगरनीले मौकामा प्रहरी समक्ष बयान गर्दा विवाहिता लोग्ने छाडी माइत बसेको ८ वर्ष भयो सोमे क्षेत्रीसंगको अनुचित सम्बन्धबाट गर्भ रही मिति २०४३।२।२० गते बेथा लागी जातक छोरा जन्मेको थियो । गर्भ रहेको र बच्चा जन्मेको कुरा बाबु आमा कसैलाई थाहा छैन मैले भनेको पनि थिइन, बच्चा जन्मेको अरुले थाहा पाए बेइज्जत होला भनी घरदेखि मुनी १०० गज दुरी मकै बारीमा लगी बच्चाको छातीमा हातले अठ्याई थिची मारी खाल्टो खनी गाडी पुरी घर फर्की आएको भनी सावित भएको पाइन्छ । तर अदालतमा बयान गर्दा बच्चा जिउँदै जन्मेको थियो, मलाई निन्द्रा लागेकोले म निदाए, बच्चा के कारणबाट कसरी मर्‍यो थाहा भएन, मैले कर्तव्य गरी मारेको होइन प्रहरीले कुटपिट गर्छन् भन्ने डरका मारे साविती बयान गरेको भए पनि मेरो राजीखुशीबाट भएको होइन भनी बच्चा कर्तव्य गरी मारेमा इन्कार रहेको देखिन्छ । यसबाट अनुचित सम्बन्धबाट गर्भ रही जन्मेको बच्चा मरेपछि आफूले गाडेको कुरामा प्रतिवादी पुतली मगरनी अदालतमा समेत सावित छ । तर जिउँदो बच्चा कसरी मरे सो कुरा खुलाउन सकेको छैन । बुझिएका जाहेरवाला अवधराम यादवले मैले पुतलीसंग सोद्धा मैले मारेको हुँ भनी भनेकीले निजैले मारेको हुनुपर्दछ भनी र सरजमीनका चन्द्रबहादुर मगर, जगतबहादुर झाँक्री मगर, ठगबहादुर मगर, डवलसिं झाँक्री मगरले पुतली मगरनीले आफूले जन्माएको जीवित बालक, इज्जतका निम्ति आफैंले कर्तव्य गरी मारी लाश गाडेको विश्वास छ भनी सरजमीनमा लेखाई दिएको कुरा स्वीकारी अदालतमा समेत आई बकपत्र गरी दिएको छ । सो बकाइबाट जन्मेको बच्चा मारी गाडेको भन्ने देखिन्छ । अर्को मौकामा प्रहरीमा कागज गर्ने जन्मेको बच्चा देख्ने भनेका यमाकुमारी घर्ती र छवि कमिनीले अदालतमा बकपत्र गर्दा पुतलीले बच्चा जन्माएकी छ भनी कसैसंग नभने भनी भनेकी थिई भनेको छ । यसबाट अनुचित सम्बन्धबाट गर्भ रही बच्चा जन्मेको कुरा प्रकाश नहोस् भन्ने उद्देश्य लिएको भन्ने पाइन्छ । साथै उक्त सरजमीनका मानिसहरुको बकाई समेतबाट अभियुक्त पुतली मगरनीले आफ्नो बेइज्जत हुन्छ भन्ने मनमा लागी बच्चाको छातीमा अठ्याई थिची मारी खाल्टो खनी गाडेको भनी प्रहरीमा गरेको साविती बयानको पुष्टि हुन आएको देखिन्छ । निज अभियुक्त पुतली मगरनीलाई अपराधी ठहराएको फैसला उपर पुनरावेदन गर्न सकेको पनि छैन । यस स्थितिमा निज अभियुक्त पुतली मगरनी निर्दोष रहेछ, भन्न सकिने अवस्था रहेन । तसर्थ प्रतिवादी पुतली मगरनीले आफ्नो गर्भबाट जन्मेको जिउँदो बच्चालाई मारी गाडेमा ज्यानसम्बन्धीको १३(३) नं. बमोजिम सर्वश्वसहित जन्मकैद गर्ने गरेको लुम्बिनी अञ्चल अदालतको इन्साफ सदर गरी साधक जाहेर गरेको पश्चिमाञ्चल क्षेत्रीय अदालतको इन्साफ मनासिब छ ।

२१.   अब घटी सजायँको लागि राय जाहेर गरेतर्फ हेर्दा अभियुक्त प्रतिवादी पुतली मगरनीले मौकामा प्रहरी समक्ष गरेको बयानमा विवाहिता लोग्ने छाडी माइत बसेकी सोमे क्षेत्रीसंगको करणी लिनु दिनुबाट गर्भ रहेको, कसैलाई थाहा थिएन, २०४३।२।२० गते जातक छोरा जन्मेको, बाबु आमालाई थाहा थिएन, अनुचित सम्बन्धबाट रहेको गर्भबाट जन्मेको बच्चा अरु कसैले देखे थाहा पाए भने बेइज्जत हुन्छ भन्ने मनमा लागी बच्चाको छाती हातले अठ्याई थिची मारेको भनेको पाइन्छ । पूर्व योजना बनाई रिसइवीबाट मारेको भन्ने देखिँदैन । विवाहिता लोग्ने बाहेकका पर पुरुषसंगको अनुचित सम्बन्धबाट गर्भ रहन गई जन्मेको जातक बच्चालाई अरुले देखे थाहा पाए बेइज्जत हुन्छ भन्ने लागी लोकापवादबाट मुक्त हुन, नवजात शिशुलाई कर्तव्य गरी मारेको भन्ने देखिन्छ । तसर्थ घटी सजायँको लागि पश्चिमाञ्चल क्षेत्रीय अदालतले लगाएको राय मनासिब देखिँदा अपराध गर्दाको अवस्थाको विचारबाट समेत प्रतिवादी पुतली मगरनीलाई ज्यानसम्बन्धीको १३(३) नं. का ऐन बमोजिम सर्वश्वसहित जन्मकैद गर्दा चर्को पर्ने देखिन आएकोले निज प्रतिवादी पुतली मगरनीलाई अ.बं. १८८ नं. बमोजिम कैद वर्ष ५ पाँच मात्र सजायँ हुने ठहर्छ । अरु तपसील बमोजिम गर्नु ।

तपसील

प्रतिवादी पुतली मगरनी के माथि इन्साफ खण्डमा लेखिए बमोजिम अ.बं. १८८ नं. ले कैद वर्ष ५ पाँच मात्र सजायँ हुन्छ । निज थुनाबाट मिति २०४४।३।१४ मा छुटेको हुँदा मिति २०४३।२।२८ गतेदेखि हिरासतमा रही २०४४।३।१३ गतेसम्म थुनामा बसेको एक १ वर्ष १६ दिन कट्टी गरी नपुग दिन ३।११।१४ तीन वर्ष एघार महीना चौध दिन कैद गर्नु पर्ने हुँदा निज बेरुजु भएकोले ऐन बमोजिम उक्त कैद असूल गर्नु भनी गुल्मी जिल्ला अदालतमा लेखी पठाउन काठमाडौं जिल्ला अदालतमा लगत दिनु...१,

प्रतिवादी पुतली मगरनी के माथि लेखिए बमोजिम कैद हुने भई लुम्बिनी अञ्चल अदालतको मिति २०४६।५।२९ गतेका फैसलाले गर्ने गरेको सर्वश्वसहित जन्मकैदको सजायँ नलाग्ने भई सो सर्वश्वसहित जन्मकैदको लगत काटी दिनु भनी गुल्मी जिल्ला अदालतमा लेखी पठाउन काठमाडौं जिल्ला अदालतमा लगत दिनु...२, मिसिल नियम बमोजिम गरी बुझाई दिनु...३

 

उक्त रायमा म सहमत छु ।

 

न्या.बब्बरप्रसाद सिंह

 

इतिसम्वत् २०४७ साल पौष १७ गते रोज ३ शुभम् ।

 

