निर्णय नं. २६३५ - दर्ता बदर

निर्णय नं. २६३५    ने.का.प. २०४३ अङ्क - २

डिभिजनबेञ्च

माननीय न्यायाधीश श्री पृथ्वीबहादुर सिंह

माननीय न्यायाधीश श्री हरगोविन्द सिंह प्रधान

सम्वत् २०४१ सालको दे.पु.नं. ५६९

फैसला भएको मिति : २०४३।२।७।४ मा

 

पुनरावेदक/प्रतिवादी : का.न.पं.वार्ड नं. ४ बस्ने भगतबहादुर मगर

विरुद्ध

विपक्षी/वादी : ऐ.ऐ.वार्ड नं.३२ डिल्लीबजार बस्ने लोकबहादुर श्रेष्ठ

 

मुद्दा : दर्ता बदर

 

(१)         हक नै नपुग्ने जग्गा छोडपत्र गरी दिएको आधारमा दर्ता गराएको देखिँदा वादी दावा बमोजिम दर्ता बदर हुने ।

(प्रकरण नं. १०)

 

पुनरावेदक/प्रतिवादीतर्फबाट : विद्वान वरिष्ठ अधिवक्ता श्री लक्ष्मणप्रसाद अर्याल

विपक्षी/वादीतर्फबाट    : विद्वान अधिवक्ता श्री होराप्रसाद जोशी

 

फैसला

न्या.पृथ्वीबहादुर सिंह : मध्यमाञ्चल क्षेत्रीय अदालतको ०४१।३।९ को फैसला उपर पुनरावेदनको अनुमति प्राप्त भई लगतमा दर्ता हुन आएको प्रस्तुत मुद्दाको संक्षिप्त तथ्य यसप्रकार छ ।

२. मोहन शमशेरबाट मैले बकसपत्र पाई भोग चलन गरी आएको महाराजगञ्जको हा.नं. १३९।३ को जग्गा नापी हुँदा का.न.पं.२२(घ) कि.नं. १६९ र २२६ तथा वार्ड नं. २३(द) को कि.नं.१।३।५२।५७।६७ समेतको रोपनी ८–४–० ठहर भएको उक्त जग्गा २०२६।१०।५ को निर्णयले जग्गाधनी दर्ता प्रमाण पूर्जा समेत पाइसकेकोमा उक्त जग्गा मध्ये कि.नं.१ को १–९–२ जग्गा विपक्षीले मुकुन्द शमशेरबाट ०३३।४।५ मा छोडपत्र गराई दर्ता गरेकोले सो दर्ता बदर गरिपाउँ भन्ने समेतको वादीको फिराद ।

३. मेरो नामको जग्गाको दर्ता बदर गरिपाउँ भन्ने वादीलाई दावी गर्ने कुनै हक अधिकार नै छैन भन्ने समेत व्यहोराको प्रत्युत्तरपत्र ।

४. वादी लोकबहादुर श्रेष्ठ र प्रतिवादी मुकुन्द शमशेर भएको यसै जग्गामा वादी दावी पुग्नै नसक्ने ठहरी दे.नं.४३ को मुद्दाबाट मिति ०३७।७।१८ मा निर्णय भएकोले यो मुद्दामा पनि सोही जग्गा हुँदा वादीको फिराद दावी पुग्न सक्दैन भन्ने का.जि.अ.को ०३७।७।१८ को फैसला ।

५.    काठमाडौं जिल्ला अदालतको फैसलामा चित्त नबुझी वादीले बागमती अञ्चल अदालतमा पुनरावेदन गरेकोमा यस मुद्दाको लगाउ दे.पु.नं. १५ पु.लोकबहादुर प्र.भक्तबहादुर मगर भएको जालसाजी मुद्दा म.क्षे.अ.मा पठाउने गरी आज यस अदालतबाट आदेश भएकोले न्या.प्र.सु.ऐन, २०३१ को दफा १३(१)(क) बमोजिम प्रस्तुत पुनरावेदनको लगत कट्टा गरी पक्ष विपक्षलाई तारेख तोकी मिसिल म.क्षे.अ.मा पठाउनु भन्ने समेत बा.अं.अ.को २०३९।७।२४।४ को आदेश ।

६. यसमा यिनै वादी प्रतिवादी भएको दे.पु.नं. ५९८ को मुद्दामा प्रतिवादी मुकुन्द शमशेरको नाममा दर्ता भएको विवादको २३(द) को कि.नं.१ को दर्ता बदर हुने ठहरी फैसला भएको हुँदा आफ्नो हकै नपुग्ने जग्गा मुकुन्द शमशेरले छोडपत्र दिएको आधारमा हक भएको भनी प्रतिवादीले दर्ता गराएको कानुन बमोजिमको दर्ता भन्न नमिल्ने हुँदा वादी दावी बमोजिम दर्ता बदर हुने ठहर्छ । शुरुले दावी नपुग्ने ठहराएको इन्साफ उल्टी हुन्छ भन्ने समेत व्यहोराको म.क्षे.अ.को मिति २०४१।३।९ को फैसला ।

७. मध्यमाञ्चल क्षेत्रीय अदालतको त्रुटिपूर्ण फैसलामा पुनरावेदनको अनुमति पाउँ भन्ने प्रतिवादीको यस अदालतमा पर्न आएको निवेदनमा पुनरावेदनको अनुमति प्रदान गरिएको छ भन्ने समेत व्यहोराको यस अदालतका डिभिजनबेञ्चको २०४१।४।२५ को फैसला ।

८. नियम बमोजिम पेशी सूचीमा चढी पेश हुन आएको प्रस्तुत मुद्दाको सम्पूर्ण मिसिल अध्ययन गरी पुनरावेदक प्रतिवादी तर्फका विद्वान वरिष्ठ अधिवक्ता  श्री लक्ष्मणप्रसाद अर्याल र विपक्षी वादी तर्फका विद्वान अधिवक्ता श्री होराप्रसाद जोशीले गर्नुभएको बहस समेत सुनियो ।

९. अब म.क्षे.अ.को इन्साफ मनासिब बेमनासिब के रहेछ निर्णय दिनु परेको छ ।

१०. निर्णयार्थ विचार गर्दा प्रतिवादी मुकुन्द शमशेर र यीनै वादी भएको आजै यस बेञ्चबाट दे.पु.नं. ५६८ को मुद्दामा पुनरावेदक प्रतिवादी मुकुन्द शमशेरको नाममा दर्ता भएको विवादको २३(द) को कि.नं.१ को जग्गाको दर्ता बदर हुने ठहरी फैसला भएको हुँदा आफ्नु हक नै नपुग्ने जग्गा मुकुन्द शमशेरले पुनरावेदक प्रतिवादीलाई छोडपत्र गरी दिएको आधारमा प्रतिवादीले दर्ता गराएको देखिँदा वादी दावा बमोजिम दर्ता बदर हुने ठहराएको मध्यमाञ्चल क्षेत्रीय अदालतको इन्साफ मनासिब हुँदा सदर हुने ठहर्छ । पुनरावेदन जिकिर पुग्न सक्दैन । कोर्टफी रही मुद्दा दायर भएको देखिँदा केही गरी रहनु परेन । मिसिल नियमानुसार बुझाइदिनू ।

उक्त रायमा म सहमत छु ।

न्या. हरगोविन्द सिंह प्रधान

 

इति सम्वत् २०४३ साल ज्येष्ठ ७ गते रोज ४ शुभम् ।