निर्णय नं. २६४३ - उत्प्रेषणको आदेश जारी गरिपाउँ
निर्णय नं. २६४३ ने.का.प. २०४३ अङ्क - २
सिंगलबेञ्च
सम्माननीय प्रधान न्यायाधीश श्री धनेन्द्रबहादुर सिंह
सम्वत् २०४३ सालको रि.नं. २३५८
आदेश भएको मिति : २०४३।२।१।५ मा
निवेदक : जिल्ला गोर्खा, गाइखुर गा.पं.वडा नं.१ भेटलटार बस्ने दुर्गे कुमाल
विरुद्ध
विपक्षी : भूमिसुधार कार्यालय, गोर्खासमेत
विषय : उत्प्रेषणको आदेश जारी गरिपाउँ
(१) बाली बाँकी रहेको आधारमा मोही निष्कासन गर्ने गरेको निर्णयलाई कानुनी त्रुटिपूर्ण भन्न सकिने स्थिति नरहने ।
(प्रकरण नं. ६)
(२) विलम्ब गरी पर्न आएको निवेदनबाट विचार गर्न सकिने अवस्था नहुने ।
(प्रकरण नं. ६)
आदेश
प्र.न्या.धनेन्द्रबहादुर सिंह : भू.सु.का.गोर्खाको ०४२।३।२८ को निर्णय फैसला बदर गरिपाउँ भनी नेपालको संविधानको धारा ७१ अन्तर्गत पर्न आएको प्रस्तुत रिट निवेदनको तथ्य यसप्रकार छ :
२. विपक्षीहरूले गोर्खा गाइखुर गा.पं.वडा नं.१ कि.नं. ५९७, ५७५ र ५७८ कित्ता ३ को अधिया बाली भराई निष्कासन गरिपाउँ भनी ०४१ सालको बालीमा दावी गरी उजूर गरेकोमा भू.सु.का.गोर्खाबाट ०४२।२।२८।६ मा म मोहिलाई निष्कासन गर्ने निर्णय भयो । ०३९ र ०४० सालको बालीको उजूरीमा विभिन्न निर्णय भई गैरकानुनी निर्णय बदर गरिपाउँ भनी यस सम्मानीत अदालतमा रिट निवेदन परी लिखितजवाफ समेत आई विचाराधीनमा रहेको छ । सो कुरा जानकारी हुँदा हुँदै पनि ०४२।३।२८ मा मोही निष्कासन हुने ठहराई गरेको फैसलाले ठूलो मर्का परेको छ ।
३. ठेक र अधिया के, हो भन्नेतर्फ रिट निवेदनबाट सम्मानीत अदालतको विचाराधीन रहेको छ । मैले ठेक तिर्न तयार छु भनेको छु । त्यस्तोमा कूत तिर्न मन नगरेको भनी बुँदा लगाई जग्गाबाट गरिएको निष्कासनको फैसला गैरकानुनी छ । ०४१ सालको उजूरी मुलतबी रही यस सम्मानीत अदालतबाट फैसला भएपछि फैसला गर्नुपर्नेमा सम्मानीत अदालतको पनि मर्यादामा आँच आउने गरी हेपी गरिएको उक्त मिति ०४२।३।२८ को फैसला उत्प्रेषणको आदेशद्वारा बदर गरिपाउँ भन्ने रिट निवेदन ।
४. निवेदकका वारिस लक्ष्मी देव सुवेदीले ०३९।४० को वालीको उजूरीमा भएको निर्णय उपर रिट निवेदन परी यसै अदालतको विचाराधीनमा छ । ०४१ सालको बालीको उजूरी मुलतबी रहनु पर्नेमा मोही निष्कासन गरेको भू.सु.का.को निर्णय त्रुटिपूर्ण हुँदा बदरभागी छ भन्ने समेत बहस गर्नुभएको प्रस्तुत निवेदनमा निवेदकका माग अनुसारको आदेश जारी हुनुपर्ने हो होइन सो कुराको निर्णय दिनुपर्ने हुन आएको छ ।
५. यसमा निर्णयतर्फ हेर्दा रिट निवेदकले पेश गरेको जिल्ला कार्यालय भूमिसुधार शाखा गोर्खाको मिति ०४२।३।२८ को निर्णयबाट म्यादभित्र ज.ध.लाई कूत बाली नबुझाएको र छलफल गर्दा बुझाउने मनसाय समेत नलिएको हुँदा पाखोतर्फ ३ कित्ताको जग्गाबाट मोही निष्कासन हुने भनी ठहर गरेको देखिन्छ ।
६. कूत तिरो बुझाई सकेको छु भन्ने रिट निवेदनबाट देखिँदैन । प्रत्यर्थी भू.सु.शाखा गोर्खाले बाली बाँकी रहेको आधारमा मोही निष्कासन गर्ने गरेको निर्णयलाई कानुनी त्रुटिपूर्ण भन्न सकिने स्थिति रहेन साथै ०४२।३।२८ को निर्णयलाई बदर गरिपाउँ भनी प्रस्तुत रिट निवेदन वारेसद्वारा ९ महीना भन्दा बढी समय विलम्ब गरी ०४३।१।७ मा मात्र पर्न आएको छ । त्यसरी विलम्ब गरी पर्न आएको रिट निवेदनबाट विचार गर्न सकिने अवस्था समेत नहुँदा विपक्षीहरूबाट लिखत जवाफ मगाई रहन परेन । प्रस्तुत रिट निवेदन खारेज हुने ठहर्छ । फायल नियम बमोजिम गरी बुझाइदिनू ।
इति सम्वत् २०४३ साल ज्येष्ठ १ गते रोज ५ शुभम् ।