निर्णय नं. ५ - हतियार चलाई काटेको

निर्णय नं. ६        ने.का.प. २०१५ अङ्क २

फूलबेञ्च

प्रधान न्यायाधीश श्री अनिरुद्धप्रसाद सिंह

न्यायाधीश श्री सिद्धिबहादुर मल्ल

न्यायाधीश श्री शेर शंकर

फौ.ठा.नं.६१

निवेदक      : नाबालक जयप्रसाद

बिरुद्ध

बिपक्षी : टेकबहादुर

मुद्दा : हतियार चलाई काटेको

 

(१)   अ.बं.१४ नं. – ज्यान मार्नाको उद्योग तथा ज्यान मार्न सम्मको अघिको रीस इवी नभई भनाभनको रीसमा नाबालकले खुकुरी चलाएमा – ज्यान मार्ने उद्योग गरेको सरकारवादी मुद्दा नठहर्ने । ज्यानै मार्ने र ज्यान मार्ने उद्योग गरी काटेको हुँ भन्ने बयान नभएको । ज्यान मार्नु पर्ने सम्मको अघिको रीस इवी पनि मिसिलबाट नदेखिएको । केटाकेटीमा भनाभनभई तत्कालको रीस खप्न नसकी हात छोडेको मिसिलहरूबाट देखिन आएको । उसमा पनि तंलाई मार्छु भनी त्यस्तरी काटेको हुँ भनी लेखेको । नाबालक मानिस भई कुन शब्दले के हुने भन्ने कुराको ज्ञान हुन नसक्ने समेतका प्रमाण परिवन्दबाट यो ज्यान मार्ने उद्योग गरेको सरकार बादी मुद्दा भन्न माथि लेखिएका परिवन्दबाट नहुने हुँदा सरकार वादी हुने मुद्दा नदेखिएको ।

(२)   अ.बं.२०४ नं. – अंग भंग भएको कुटपीटमा – मिलापत्र गर्न चाहेमा – हुन नसक्ने मिला – पत्र गराउने तर्फलाई घा जाँच फारामबाट अंग भंग भएको देखिंदा अंग भंग मुद्दामा मिलापत्र गर्न ऐनले नहुने हुँदा त्यसतर्फ ऐन सवाल बमोजिम गर्नु ।

 

आदेश

            यसमा हामीहरू नाबालक थियौं र ०७ साल अश्विन महिनाको कुरा हो । विहान पढाई छुटी घर जान लाग्दा अम्बा खान जाने कुरा भई टेकबहादुर पछि म जयप्रसाद अघी जाँदा मुखामुख भनाभनभई टेकबहादुरले मलाई खुकुरीले काटेकोमा औषधी गर्दा म बाँचे । मेरो क्षति प्रतिवादीले पूर्ति गर्ने भई मिल्न जादाँ मिल्न नदिएकोले मिलापत्र गर्न पाउँ भन्ने समेत जयप्रसाद र सोही बमोजिम बादीको क्षतिपूर्ति गर्न मन्जूर छ । मिल्न पाउँ भन्ने समेत टेकबहादुरको निवेदनपरेकोमा प्रधान न्यायालय फुलबेञ्चबाट ०१२।६।१९।४ मा उक्त मुद्दाको मिसिल झिकाई पेश गर्नु । टेकबहादुर जयप्रसादलाई विराटनगर अपील मै तारिखमा राख्नु भन्ने आदेश भई गए अनुसार मिसिल आएको भई निजहरूको मर्न बाँच्न दोसाँध र सो खोरज गरी कुटपीट मुद्दा दायर भएको मिसिल आएको सो मिसिलहरू राखी पेश हुन आएको बुझ्दा ०७।६।१३ मा मौकामा प्रतिवादी टेकबहादुरले गरेको बयान हेर्दा सो टायम निज नावालक बर्ष १४ को भएको र अगाडि हिंड भन्ने कुराको कुराले भनाभनभई त्यही रीसले मैले खुकुरीले ठाउँ ठाउँमा हानेकोबाट निज लडेको हो भन्ने २ सवालको जवाफ र ३ सवालको जवाफमा चाहिं माथि दफामा लेखिए बमोजिम भई मेरो मन ज्ञानले नै भनाभनभई खुकुरीले काटेको हुँ । सो भनाभनको रीसले तँलाई मार्छु भनी त्यस्तरी हानी काटेको हुँ भन्ने जवाफ दिएको देखिएको भई त्यसमा विचार गर्दा ज्यानै मार्ने र ज्यान मार्ने उद्योग गरी काटेको हुँ भन्ने बयान नभएको । ज्यानमार्नु पर्ने सम्मको अघिको रीस इवी पनि मिसिलबाट नदेखिएको । केटाकेटीमा भनाभनभई तत्कालैको रीस खप्न नसकी हात छाडेको मिसिलहरूबाट देखिन आएको । उसमा पनि तँलाई मार्छु भनी त्यस्तरी काटेको हुँ भनी लेखेको । नावालक मानिस भई कुन शब्दले के हुने भन्ने कुराको ज्ञान हुन नसक्ने समेतको प्रमाण परिवन्दबाट यो ज्यान मार्न उद्योग गरेको सरकारवादी मुद्दा भन्न माथि लेखिएका परिवन्दबाट नहुने हुँदा सरकारवादी हुने मुद्दा नदेखिएकोले यो कुटपीट मुद्दा हुन आएको । मिलापत्र गराउने तर्फलाई घा जाँच फारमबाट अंग भंग भएको देखिदा अंग भंग मुद्दामा मिलापत्र गर्न ऐनले नहुने हुँदा त्यस तर्फ ऐन सवाल बमोजिम गर्नु भनी यो आदेश सहितको मिसिल विराटनगर अपीलमा पठाई दिने ।

 

इति सम्बत् २०१३ साल भाद्र २७ गते रोज ३ शुभम् ।