निर्णय नं. १२ - जग्गा हटक जालसाज

निर्णय नं. १२                   ने.का.प. २०१६

(रूलिङ्ग बाझिएकोले डिभिजन बेञ्च ऊपर)

फुल बेञ्च

प्रधान न्यायाधीश श्री अनिरूद्रप्रसाद सिंह

न्यायाधीश श्री मुक्तिकान्त मैनाली

न्यायाधीश भैरवप्रसाद उपाध्याय

दे.फु.नं. ११

अपीलाट : मनोरथ उपाध्याय

विरूद्ध

रेस्पोण्डेन्ट : विष्णुप्रसाद उपाध्याय समेत

मुद्दा : जग्गा हटक जालसाज

(१)   आखिरी तह आईसकेको मुद्दामा–कानूनले समेत बाधा अड्काउ नहुने भए आखिरी तहबाटै इन्साफ तहकिकात गरी दिने ।

     यस्तो १ तह इन्साफ गरिसकेको मुद्दामा अरू तहबाट खारेज गर्ने गरेको भए पनि आखिरी तह आईसकेको फेरी फिर्ता पठाउने गर्दा मुद्दावाला रैती दुनियाँलाई असुविधा दुख हुन जाने हुनाले र कानूनले समेत बाधा अड्काउ नहुने भएबाट यस्तोमा अब उप्रान्त आखिरी तह आईपुगेकोमा जो ठहर्छ आखिरी तहबाटै ईन्साफ तहकिकात गरी दिने ०१४।९।१९।५ को डिभिजन बेञ्चको राय फैसला मनासिव छ ।

 

फैसला

            यसमा धनकुटा अपीलबाट पञ्चायतले कारवाई गरेको यो मुद्दा हद माथिको हुँदा अदालतमा नालिस गर्न जानु भनी वादीलाई सुनाउने गरेको, सिंगलबेञ्चले कारवाई गर्दा हद माथि देखि पञ्चायतबाट मुद्दा छिन्न अदालतमा सारी पठाएको हुँदा खारेज गर्न नहुने भई इन्साफ गर्न धनकुटा अपीलमा पठाई दिनु भन्ने र प्रस्तुत मुद्दा पञ्चायतले मिलापत्र कारवाई गर्न नपाउने भन्ने नदेखिई फैसला गरी छिन्न परी इलाका पूर्व ४ नं. भोजपुर अदालतमा पंचायती अदालत ऐनका ४२ दफाबमोजिम मुद्दा सारी पठाई अदालतबाट छिनी फैसला भएको भई १ तह शुरू अदालतबाट इन्साफ गरिसकेको । अपीलले खारेज गरेको । फेरी तहकिकात गरी छिन्नु भनी फिर्ता पठाउने गर्दा आखिर तहसम्म आईसकेको मिसिल फिर्ता गई तह तह चढी फेरी आखिरी तहमा आउनु परी मुद्दावालालाई धेरै दुख हुने र त्यस्तो अवस्थाको मुद्दा माथिल्लै तहबाट छिनी दिएमा कानूनी बाधा समेत नपरी जनतालाई सुविधा हुने देखिएकोले इन्साफतर्फको ठहर गर्ने यस्तै अपीलबाट इन्साफ हारजीतको फैसला नगरी खारेज गरेको गंगाबहादुर जोगबहादुरको जग्गा मुद्दामा सो धनकुटा अपीलको खारेजी फैसला बदर भई दर्ता भएको । फिरादबाटै कानूनबमोजिम गर्नु भनी मिसिल धनकुटा अपीलमा पठाउने गरी ०१४।६।२८ श्री मा.न्या. हेरम्बराज श्री मा.न्या. भैरवप्रसादजीहरूको डिभिजन बेञ्चबाट आदेश फैसला भईसकेको देखिएकोले सो डिभिजन बेञ्चको रायसँग रूलिङ्ग बाझिने भएबाट नियमबमोजिम फुल बेञ्चमा पेश गर्नु भन्ने समेत ०१४।९।१९।५ मा श्री माननीय प्रधान न्यायाधीशज्यू र श्री माननीय न्यायाधीश मीनबहादुरजीको डिभिजन बेञ्चबाट फैसला आदेश भएकोबाट पेश हुन आएको प्रस्तुत मुद्दा बुझ्दा यस्तो १ तह इन्साफ गरिसकेको मुद्दामा अरू तहबाट खारेज गर्ने गरेको भए पनि आखिरी तह आईसकेको फेरी फिर्ता पठाउने गर्दा मुद्दावाला रैती दुनियाँलाई असुविधा दुःख हुन जाने हुनाले र कानूनले समेत बाधा अड्काउ नहुने भएबाट यस्तोमा, अब उप्रान्त आखिरी तह आईपुगेकोमा जो ठहर्छ आखिरी तहबाटै इन्साफ तहकिकात गरी दिने ०१४।९।१९।५ को डिभिजन बेञ्चको राय फैसाला मनासिव छ । सो बमोजिम इन्साफ र लगत दिने काम समेत उक्त डिभिजन बेञ्चका फैसलाबाटै भईसकेकोले यसबाट अरू केही गर्नु पर्दैन । यो निर्णय भएबमोजिम यस्ता किसिमका मुद्दामा लेखिएबमोजिम यहींबाटै इन्साफ तहकिकात गरी दिने गर्न यो निर्णयको सर्कुलर बेञ्च बेञ्चमा पठाई दिन यो निर्णय फैसलाको १ प्रति कपी रजिष्ट्रार अफिसमा पठाई दिनु ।

 

इति सम्वत् २०१५ साल आषाढ ३१ गते रोज ३ शुभम् ।