निर्णय नं. ८४ - बन्धकी थैली बुझाई पाउँ

निर्णय नं. ८४       ने.का.प. २०१६

सिंगलबेञ्च

का.मु.प्रधान न्यायाधीश श्री भगवतीप्रसाद सिंह

दे.ठा.नं. ६३

निवेदक, प्रतिवादी : रोहीणीप्रसाद उपाध्याय

विरुद्ध

विपक्षी : इन्द्रप्रसाद उपाध्याय

मुद्दा : बन्धकी थैली बुझाई पाउँ

१.    मनासिव माफिकाको कारण बताई थैलि बुझी लिन मञ्जुर नगरेमा नालिस गर्नु भनी सनद सदर भएकोमा मनासिव माफिकको कारण केही नबताई पास नभएको चिट्ठीको भरबाट पास भएको बन्धकी लिखत थैली बुझ्न मञ्जुर नगरे मनासिव नदेखिने ।

     झिकाई आएका निखन्ने विषयको सनद ०३।१२।८।६ को नभई मिसिल सामेल रहेको ०४।४।६ मा सदर भएको सनदको उतार देखिएको त्यसको ३ दफा उतारमा धरौटी रुपैया साहुले बुझ्न मञ्जुर नगरेमा अदालतमा नालिस गर्न जानु भनी सुनाई दिने गरी जाहेर भएकोमा मनासिव माफिकको कारण बताई थैली बुझी लिई मन्जूर नगरेमा नालिस गर्नु भनी सुनाई दिने व्यहोराका सनद सदर भएको देखिएकोमा मनासिव माफिकको कारण केही नबताई पास नभएको चिठ्ठीको भरबाट पास भएको बन्धकी लिखत बमोजिम थैली बुझ्न मञ्जुर नगरेको साहुको जिकिर मनासिव नदेखिएकोले समेत १५।११।२१ को सर्वोच्च अदालत पश्चिम दौडाहाका सिंगलबेञ्चबाट भएको इन्साफ मनासिव छ ।

(प्रकरण नं. ९)

फैसला

      १.     यसमा मेरो ब्राम्हणी टिकाकुमारीले ९।८।२०।६ मा रोहिणीप्रसादसँगबाट मो.रु.१००२। कं.रु ९९९ समेत लिई धैरैता भन्या बिर्ता खेत मुरी ।१३ भोगबन्धक पास गरी दिएकी थैली लिई जाँदा नबुझेकाले बुझाई पाउँ भन्ने समेत वादी इन्द्रप्रसादको उजुरी दर्खास्त ।

      २.    मलाई बुझाउन ल्याएको पनि छैन १० बर्ष तक निखनी लिने दिने छैन भन्ने चिठी हुँदा हाल बुझ्नु नपर्ने भन्ने समेत रोहिणीप्रसादको कागज ।

      ३.    खाली चिठीका भरले पास नभई मान्यता दिन उचित नदेखएकोले समेतबाट बुझ्नु पर्ने थैली नबुझेकै ठहराई गुल्मी माल अड्डा बागलुङ पोटले टिप्पणी गरेकोमा ०४।४।६ मा सदर भएको हक सफा बन्धकी थैली निखन्ने बारेको सनदको ३ दफाले हक बेहकतर्फको इन्साफतहकिकात गर्नु अघिका र प्राप्त भएको नभई अदालतमा उजुर गर्न जानु भनी सुनाउनु पर्ने समेतबाट इलाका अदालतमा नालिस दिई हक बेहक छुट्याई ल्याउनु भनी सुनाई दिने भन्ने गुल्मी माघ तम्घासका हाकिमको पर्चा ।

      ४.    पर्चा उपर चित्त बुझेन भन्ने समेत वादीको अपील ।

      ५.    सल्लाहबाटै रुपैयाँ धरौट राखिएको हो भन्ने समेत वागलुङ गौडाबाट बुझिएको टिकाकुमारीको वा.दानराजको बयान ।

      ६.    टिकाकुमारी बुझेमा सल्लाहबाटै धरौट राखेको हो भन्ने बारिसद्वारा बयान गरेको समतेबाट गुल्मी माल वागलुङबका का.मु.हरूले गरेको राय समेतबाट हाकिम ना.सु.पूर्णबहादुरले गल्ती इन्साफ गरेको ठहर्छ भन्ने बागलुङ छोटी गौडाको फैसला ।

      ७.    गौडाको इन्साफमा चित्त बुझेन भन्ने समेत रोहिणीप्रसादको अपील ।

      ८.    इन्साफ बागलुंङ छोटी गौडाको मनासिव भन्ने सिंगलबेञ्चको फैसला ।

      ९.    रिभ्यू गरी पाउँ भनी निवेदकको निवेदन परेकोमा ०३।१२।८।६ मा सनदमा रजिष्ट्रेशन पास भएको जतिमा थैली धरौट राखी दर्खास्त दिने र अड्डाले साहुलाई झिकाई थैली बुझी लिन मञ्जुर नगरेमा नालिस दिनु भनी सुनाई दिनु भन्ने लेखिएको भनी रिभ्यूको निस्सा भई पेश हुन आएको यस मुद्दामा तारिखमा रहेको निवेदकको वारिस समेत राखी बुझ्दा झिकाई आएको निखन्ने विषयको सनद ०३।१२।८।६ को नभई मिसिल सामेल रहेको ०४।४।६ मा सदर भएको सनदको उतार देखिएको त्यसको ३ दफा उत्तारमा धरौटी रुपैया साहुले बुझ्न मञ्जुर नगरेमा अदालतमा नालिस गर्न जानु भनी सुनाई दिने गरी जाहेर भएकोमा मनासिव माफिकको कारण बताई थैली, बुझी लिई मञ्जुर नगरेमा नालिस गर्नु भनी सुनाई दिने व्यहोराका सनद सदर भएको देखिएकोमा मनासिव माफिकको कारण केही नबताई पास नभएको चिठ्ठीको भरबाट पास भएको बन्धकी लिखतबमोजिमको थैली बुझ्न मञ्जुर नगरेको साहूको जिकीर मनासिव नदेखिएकाले समेत १५।११।२१ को सर्वोच्च अदालत पश्चिम दौडाका सिंगलबेञ्चबाट भएको इन्साफ मनासिव छ दोहराएमा निवेदक रोहिणीप्रसाद के हा.का. ११ नं. बमोजिम शुरु दन्ड ने.रु.१० को दशौंद ने.रु.१। एक दन्ड हुन्छ वारिस हुँदा ऐनबमोजिम गर्नु भनी तहसिलमा लगत दिई मिसिल नियमबमोजिम बुझाई दिनु ।

 

 

इति सम्वत् २०१६ साल चैत्र २४ गते रोज ४ शुभम् ।