निर्णय नं. ११३ - खारेज भएको ठाउँमा बसी काम गरे भन्ने

निर्णय नं. ११३                              ने.का.प. २०१७

फुलबेञ्च

का. मु. प्रधान न्यायाधीश श्री भगवतीप्रसाद सिंह

न्यायाधीश श्री रत्नबहादुर विष्ट क्षेत्री

न्यायाधीश श्री कालीप्रसाद उपाध्याय

रि. नं. ६

निवेदक      : डे. से. गजेन्द्रबहादुर प्रधानाङ्ग

विरुद्ध

विपक्षी : श्री बत्सराज समेत

मुद्दा : खारेज भएको ठाउँमा बसी काम गरे भन्ने ।

(१)   मिसिल सामेल रहेको पुर्जी नक्कलमा पद खारेज नभई मानिस खारेज गरेको देखिएमा पदै खारेज भएको भन्न नमिल्ने ।

     क. कि. निजामती फाँटका ०१४ साल माघ २१ गते रोज २ का पुर्जी नक्कल मिसिल सामेल रहेकोबाट बन मन्त्रालयको डे. से. पद र डे. से. गजेन्द्रबहादुर दुबैलाई खारेज गरेको देखि ०१५ साल पौष १४ गते २ का गजेन्द्रबहादुरलाई दिएको मिसिल सामेल रहेको पुर्जी नक्कलले पद खारेज भएको नदेखि मानिस खारेज गरेको देखिएकोले निवेदकको दुबै डे. से. पद खारेज भईसकेको भन्ने जिकिर पुग्न नआएकोले दुबै डे. से. पद खारेज भएको भन्न नमिल्ने ।

(प्रकरण नं. ३)

आदेश

            १.     बन मन्त्रालयमा ठेकी रहेको डे. से. पद २ मध्ये निवेदक बसेको डे. से. पदचाहिँ जित फैसलाहरू अनुसार मलाई चार्ज दिनु दिलाउनुपर्ने भएकोले सो दरबन्दी कायम राखी चार्ज दिने दिलाउने श्री ५ को सरकार लगायत सरोकारवाला बन मन्त्रालय, कार्यपालिकालाई कानूनी तवरले बाध्य गराई परमादेशको रीट जारी होस । श्री ५ को सरकारको ०१५।९।१० को निर्णयले विपक्षीहरूबाट परस्पर सम्बन्ध राखि उपभोग गरिरहेको पद खारेज हुन पर्न गएकोले विपक्षीहरू सबै श्री बत्सराज र ईश्वरनाथलाई हटाई पठाउनु भन्ने श्री ५ को सरकारको नाउँमा परमादेश र बस्ने अधिकार नभएकोले हटाई दिएको छ भन्ने विपक्षीहरूको श्री बत्सराज र इश्वरनाथ गोगलका नाउमा अधिकारपृच्छाको रीट जारी होस । निवेदकले पेश गरेको बन मन्त्रालयकै लिखित प्रमाण र क. कि. निजामती फाँटको समेत लिखित प्रमाणबाट बन मन्त्रालयमा ठेकी रहेको डे. से. पदको २ दरबन्दीमा दुबै डे. से. पदको दरबन्दी खारेज गरी स्पष्ट पुरा तवरले देखिन आएकोले पदै कायम नभएको ठाउँमा राखी बसी काम काज गराई राख्न नहुने हुनाले मुद्दा किनारा नलागेसम्मलाई दरबन्दी भई कायम भएको पद नहुनाले पद नभएको ठाउँमा बसी कामकाज गरी रहन नहुने र पद नभएपनि कामकाज गर्नु भन्ने श्री ५ को सरकारबाट विशेष आदेश भई रहेको पनि नहुनाले पदै नभएको ठाउँमा बसी कामकाज गरी रहन नहुने भएकोले हाललाई कामकाजबाट हट्नु हटाउनु भन्ने श्री ५ को सरकार र विपक्षीहरू सबै श्री बत्सराज इश्वरानाथहरूका नाउँमा प्रतिषेध र सर्वोच्च अदालत ऐन दफा ११ अन्तर्गतका जो चाहिने आज्ञा आदेश पुर्जीहरू जारी गरी पाउँ भन्ने समेत गजेन्द्रबहादुर प्रधानाङ्गको निवेदनपत्र ।

            २.    उक्त निवेदनपत्र फुल ठाडो किताबमा दर्ता गरी दिनु भन्ने श्रीमाननीय का. मु. प्रधान न्यायाधीस सिद्धिबहादुर मल्लबाट आदेश भएको ।

            ३.    उक्त आदेश बमोजिम फुलबेञ्चमा पेश हुन आएको यो रीटको निवेदनपत्रको व्यहोरा निवेदकका वारिस निजका छोरा मृगेन्द्रबहादुर प्रधानाङ्ग राखी बुझ्दा यसमा, क. कि. निजामती फाँटका ०१४ साल माघ २१ गते रोज २ का पुर्जी नक्कल मिसिल सामेल रहेकोबाट बन मन्त्रालयको डे. से. पद र डे. से. गजेन्द्रबहादुर दुबैलाई खारेज गरेको देखि ०१५ साल पौष १४ गते २ का गजेन्द्रबहादुर लाई दिएको मिसिल सामेल रहेको पुर्जी नक्कलले पद खारेज भएको नदेखि मानिस खारेज गरेको देखिएकोले निवेदकको दुबै डे. से. पद खारेज भईसकेको भन्ने जिकिर पुग्न नआएकोले दुबै डे. से. पद खारेज भएको भन्न नमिल्ने । निवेदकका अरू उजुरको निर्णय निजका निवेदन रीट नं. ५ का उपर सर्वोच्च अदालत फुलबेञ्चबाटै ०१५।११।१५।५ मा बहुमतबाट भएको यसबाट मुद्दाको रूपरेखासम्म पनि बस्न नआएकोले यो निवेदनपत्रबाट अरू केही कारवाई गर्न नमिल्ने हुँदा खारेज हुने ठहर्छ ।

 

इति सम्वत् २०१७ साल कार्तिक २ रोज ३ शुभम् ।