निर्णय नं. २६९८ - अंश
निर्णय नं. २६९८ ने.का.प. २०४३ अङ्क -४
डिभिजनबेञ्च
माननीय न्यायाधीश श्री गजेन्द्रकेशरी बास्तोला
माननीय न्यायाधीश श्री प्रचण्डराज अनिल
सम्वत् २०४१ सालको दे.पु.नं. ४२८
फैसला भएको मिति : २०४३।४।१९।१ मा
पुनरावेदक/प्रतिवादी : धादिङ जि.नौविसे गा.पं.वडा नं.४ बस्ने श्रीमती केशरकुमारी पाण्डे
विरुद्ध
विपक्षी/वादी : ऐ.ऐ.बस्ने सरस्वती पाण्डेसमेत
मुद्दा : अंश
(१) वादी दावी स्वीकार गर्दै प्रतिवाद गरेको हुँदा पिता तथा पतिबाट अंशबण्डा भइसकेको भन्न मिलेन ।
(प्रकरण नं. १३)
पुनरावेदक/प्रतिवादीतर्फबाट : विद्वान अधिवक्ता श्री सुधानाथ पन्त
विपक्षी/वादीतर्फबाट : विद्वान अधिवक्ता श्री दुर्गाप्रसाद सुब्बा
फैसला
न्या.प्रचण्डराज अनिल : मध्यमाञ्चल क्षेत्रीय अदालतको इन्साफमा चित्त नबुझी पुनरावेदनको अनुमति पाउँ भनी प्रतिवादी केशरकुमारी पाण्डेको यस अदालतमा निवेदन परी पुनरावेदनको अनुमति प्राप्त भई पेश हुन आएको प्रस्तुत अंश मुद्दाको संक्षिप्त विवरण यसप्रकार छन् :
२. विपक्षी विष्णुप्रसाद हाम्रो पति पिता र केशरकुमारी बुहारी भाउजु हुन् । विष्णुप्रसादका जेठा छोरा देवप्रसाद, माहिलो म दामोदर, साहिलो म सूर्यप्रसाद, काहिलो म श्रीधर र कान्छो म मुकुन्दराज समेत ५ भाइ एकसगोलमा बसी आएका थियौं । नापी आउँदा देवप्रसादले राम्रो र धेरै आफ्नो नाउँमा अरु भाइ र बाबुको नाममा नपाई आमाको नाममा १ रोपनी पनि नपाएको रहेनछ । मिति ०३५।१२।१६ मा देवप्रसादको परलोक भएपछि यही वैशाख १६ गतेदेखि मानु छुट्टि भिन्न खान थालेकोले म सरस्वती र अरु छोरा जेठी बुहारी आफ्नु समेत अंश भाग छुट्याई दिनुहोस् भनी अनुरोध गर्दा जेठी बुहारीकै पक्षमा लागी जति जति दर्ता भएको छ उति जग्गा लिन बाध्य गराउने इच्छा गर्नुभएकोले पृथक पृथक छोराको नाममा नापी भएको भन्दैमा त्यसलाई बण्डा भन्न कानुनले नमिल्ने हुँदा सबैको नाममा नापी भएको जग्गा जमीनको जो जति छ फिराद परेको अघिल्लो दिन सम्मको तायदाती फाँट विपक्षीहरूबाट लिई ७ अंशियार भएको र म मुकुन्दराजको विवाह खर्च परसारी ५ भाग अंश हामीहरूको भाग छुट्याई पाउँ भन्ने समेत व्यहोराको फिराद दावी ।
३. वादीहरू र जेठी बुहारी समेत मेरो समान हुन कसैलाई कमसल र धेर थोर दिने मेरो उद्देश्य नभएकोले नरम गरम मिलाई सबै छोरा बुहारी र श्रीमतीलाई बराबर अंश दिन मञ्जूर छु भन्ने समेत व्यहोराको विष्णुप्रसादको प्रतिउत्तरपत्र ।
४. मेरो खसम छँदै वादीहरू एकासगोलमा बस्ने हुँदा ससुरा सासुको २ भाग ससुरा विष्णुप्रसादको भागमा सगोल राखी अरु विपक्षीहरूको र मेरो खसमको पृथक पृथक अंश भाग लगाई ०२६ साल मै छुट्टि बेगल भई आफ्नो आफ्नो अंश भाग आ–आफूले भोग तिरो गरी खाई आएको हुँदा सर्भेमा विभिन्न कित्ता छुट्टाछुट्टै आ–आफ्नो नाममा नापी दर्ता गराई भोग तिरो गरी जग्गाधनी प्रमाण पूर्जा लिई आएका छौं । मेरो खसम देवप्रसादले मकवानपुर मालमा तिरो तिर्नु पर्ने हाडीखोला भन्ने जग्गा विगहा १–१३–४ ०२८।०२९ सालमा राजीनामा गरी लिई खसमको शेषपछि मेरो एकलौटी हक रहेको जमीन हात लाउने उद्देश्यबाट झुठ्ठा फिराद दावी गरेकोले झुठ्ठा दावीबाट अलग फुर्सद भई ०२६ सालमै छुट्टी बेगल भई आ–आफ्नो नाउँमा दर्ता भएको लेखत प्रमाणलाई कायम गरिपाउँ भन्ने व्यहोराको केशरकुमारीको प्रतिउत्तरपत्र ।
५. वादी प्रतिवादी ०२६ सालमा छुट्टिएका हुन देवप्रसादले आर्जेको सम्पत्ति खान झुठ्ठा उजूर गरेको हो भन्ने समेत व्यहोराको प्र.केशरकुमारीको साक्षी पद्मबहादुरको बकपत्र ।
६. वादी श्रीधर, दामोदर समेतको दर्ता सम्बन्धी मुद्दामा निजहरूको वारेस भई विष्णुप्रसादले ४ नं.नापी गोश्वारामा बयान गर्दा विवादको जग्गा बाबु विष्णुप्रसादका नामको जग्गा अंशबण्डा छोडपत्रबाट ०३४ सालदेखि हाम्रो नाउँमा कायम भएको भनी उल्लेख भएबाट प्र.केशरीकुमारीको जिकिर अनुसार ०२६ सालमै वादी प्रतिवादीहरू अंशबण्डा गरी अलग अलग व्यवहार गरी बसेको देखिन आएबाट अंशबण्डाको ३० नं. ले अंश दिलाई पाउँ भन्ने वादी दावी पुग्न सक्दैन भन्ने समेत व्यहोराको धादिङ जिल्ला अदालतको फैसला ।
७. शुरुको इन्साफमा चित्त नबुझी वादी सरस्वती पाण्डेको मध्यमाञ्चल क्षेत्रीय अदालतमा परेको पुनरावेदनपत्र ।
८. अंशमा वादीको दावी नपुग्ने ठहराएको शुरुको इन्साफ उल्टाई अंशबण्डा गरी हक इन्साफ पाउँ भन्ने प्रतिवादी विष्णुप्रसादको मध्यमाञ्चल क्षेत्रीय अदालतमा पर्न आएको पुनरावेदनपत्र ।
९. पैतृक सम्पत्ति नीतिपूर्वक बराबर भाग बण्डा भई नामसारी दर्ता तिरो भरो गरेको अभावमा सर्भेमा भएको दर्ताको आधारमा अंशबण्डाको ३० नं. लगाई अंशमा दावी नपुग्ने ठहराएको शुरुको फैसला नमिली फरक पर्ने देखिँदा विपक्षी झिकाई पेश गर्नु भन्ने म.क्षे.अ.को ०४०।२।२३ को आदेश ।
१०. वादी प्रतिवादीहरू अंशियार भएकोमा विवाद छैन । निजहरू बीच रीतपूर्वकको बण्डापत्र भएको देखिँदैन । व्यवहार भोग चलनको आधारमा बण्डा भइसकेको तथ्ययुक्त प्रमाणको अभाव वादीहरूले अंश पाउने नै देखिएकोले मानु छुट्टिएको नालिश परेको अघिल्लो दिन ०३८।२।१९ सम्मको ऋण धनको तायदाती दुवैपक्षहरूबाट लिई परस्पर सुनाई पेश गर्नु भन्ने समेत व्यहोराको म.क्षे.अ.को डिभिजनबेञ्चको आदेश ।
११. फिराद परेको अघिल्लो दिन मानो छुट्टिएको मिति कायम हुन्छ । ०३८।२।१७ सम्मको वादी प्रतिवादीबाट तायदाती माग भई दाखिल भएकोमा प्रतिवादीहरूले दाखेल गरेको तायदातीमा प्र.केशरकुमारीको तायदातीको जग्गा प्र.विष्णुप्रसादले दिएको तायदातीमा समावेश भएको तर मूल्यको हकमा फरक फरक उल्लेख भएको हिसाब गर्दा जग्गा धन तर्फको बिगो रु.६५४४९।– देखिन आएको र वादी मध्येको मुकुन्दको विवाह भएको भन्ने नहुँदा अरु अंशबण्डा ५% प्रतिशतले विवाह खर्च परसारी ऋणका हकमा साहूको उजूर परेमा ठहरे बमोजिम हुने नै हुँदा बाँकी तायदाती बमोजिमको धन सम्पत्तिमा ७ भागको ५ भाग वादीले अंश पाउने ठहर्छ भनी शुरु.जि.अ.को इन्साफ उल्टी ठहराई म.क्षे.अ.ले इन्साफ गरेको रहेछ ।
१२. मध्यमाञ्चल क्षेत्रीय अदालतले गरेको इन्साफमा चित्त नबुझी निवेदक प्रतिवादी केशरकुमारी पाण्डेको यस अदालतमा पुनरावेदनको अनुमति पाउँ भनी निवेदन परेकोमा निवेदकवाला प्रसाद पाण्डे विपक्षी दामोदर पाण्डे समेत भएको जग्गा दर्ता सम्बन्धी ४ नं. नापी गोश्वराबाट ०३५।६।१२ मा निर्णय भएको मिसिलमा प्रस्तुत मुद्दामा वादीहरू दामोदरप्रसाद पाण्डे र श्रीधरराज पाण्डेले मिति ०३५।५।८ मा उक्त जग्गा मेरा बाबु विष्णुप्रसाद पाण्डेका नाउँमा नम्बरी दर्ता भएको जग्गा हो मेरो बाबुबाट अंशबण्डा छोडपत्र गरी दिएको हुँदा ०३४ सालदेखि मेरा नाउँमा कायम भई भोग चलन गरी आएको छु भनी छुट्टाछुट्टै बयान गरेको देखिएको र वादीहरूका नाउँमा छुट्टाछुट्टै जग्गा दर्ता रहेको देखिएकोबाट वादी र प्रतिवादीहरू बीचमा अंशबण्डा भइसकेको मान्नु पर्नेमा वादीहरूले अंश पाउने ठहराई गरेको म.क्षे.अ.को फैसलामा अंश बण्डाको ३० नं. को त्रुटि र अ.बं.को १८४(क) १८५ र प्रमाण ऐन, २०३१ को दफा ५४ समेतको त्रुटि देखिएकोले न्या.प्र.सु.ऐन, ०३१ को दफा १३(५)(ख) बमोजिम पुनरावेदनको अनुमति यस अदालतको डिभिजनबेञ्चबाट मिति ०४३।३।१९ मा प्राप्त भएको रहेछ ।
१३. नियम बमोजिम दैनिक पेशी सूचीमा चढी पेश हुन आएको प्रस्तुत अंश मुद्दामा पुनरावेदक प्रतिवादी केशरकुमारीको तर्फबाट विद्वान अधिवक्ता श्री सुधानाथ पन्त र विपक्षी वादी सरस्वती पाण्डे समेतको तर्फबाट विद्वान अधिवक्ता श्री दुर्गाप्रसाद सुब्बाको बहस समेत सुनी निर्णयतर्फ विचार गर्दा प्रस्तुत मुद्दामा मध्यमाञ्चल क्षेत्रीय अदालतले गरेको इन्साफ मनासिब बेमनासिब के रहेछ निर्णय दिनु परेको छ । यसमा विपक्षी विष्णुप्रसाद र केशरकुमारी पाण्डेबाट अंश दिलाई भराई पाउँ भन्ने वादी दावी भएकोमा विपक्षीबाट वादीहरूले अंश पाउने हो होइन के रहेछ सो सम्बन्धमा विचार गर्दा विष्णुप्रसाद वादीहरुको पति तथा पिता देखिएको र विष्णुप्रसादको नाउँको जग्गा प्र.केशरकुमारीको लोग्ने देवप्रसादको नाउँमा नामसारी दर्ता भएको देखिन्छ । यस्तै अन्य अंशियारहरू दामोदर श्रीधर सूर्यप्रसादका नाउँमा पनि दर्ता फुटी दर्ता भएको देखिन्छ तर सरस्वतीको नाउँमा कुनै जग्गा दर्ता भएको देखिँदैन । विष्णुप्रसादले प्रतिउत्तर दिँदा अंशबण्डा हुनुपर्ने भनी प्रतिउत्तर दिएको देखियो यसरी वादी दावी स्वीकार गर्दै प्रतिवाद गरेको हुँदा पिता तथा पति विष्णुप्रसादबाट अंशबण्डा भइसकेको भन्न मिलेन तर प्रतिवादी केशरकुमारीको हकमा हेर्दा केशरकुमारी पाण्डेले आफ्नो प्रतिउत्तरपत्रमा आफ्नो पति देवप्रसादकै समयमा ०२६ सालमा नै अंशबण्डा लिई भिन्न बसेको भनेको र पद्मबहादुर फुयाल तथा तिलकप्रसाद पाण्डेले प्र.केशरकुमारी मात्रै छुट्टि भिन्न भई बसेको र ०३४ सालमा सर्भे नापी हुँदा आ–आफ्नो नाउँमा नापी दर्ता भइसकेको छ, भनी किटानी बकी लेखी दिएको देखिन्छ । देवप्रसादको नाममा रहेको जग्गा नापी दर्ता फुटाई अंश बापत नामसारी भएको देखिन्छ तसर्थ केशरकुमारीलाई सगोलको अंशियार भन्न मिलेन प्र.विष्णुप्रसादको हकभोगको अंशबाट मात्र ६ भागको ५ भाग अंश वादीहरूले पाउने देखिन्छ । केशरकुमारीबाट मृतक देवप्रसादको नाउँको जग्गा अंश भाग बण्डा लगाएको सम्म म.क्षे.अ.को इन्साफ नमिलेको हुँदा केही उल्टी हुने ठहर्छ । तपसील कुरामा तपसील बमोजिम गर्नु ।
तपसील
माथि इन्साफ खण्डमा लेखिए बमोजिम म.क्षे.अ.को इन्साफ केही उल्टी हुँदा पुनरावेदक प्रतिवादी केशरकुमारी पाण्डेले यस अदालतमा पुनरावेदनको लगत दर्ता हुँदा म.क्षे.अ.को ०४१।९।१८।३ को फैसलाले निवेदिका केशरकुमारी पाण्डेबाट असूल हुनुपर्ने रु.८९८।– ६४ धरौटीमा आम्दानी बाँधेको देखिएकोले उक्त रकम फिर्ता पाउँ भनी प्रतिवादी केशरकुमारीले कानुनको म्यादभित्र निवेदन दिएमा ऐन नियमको रीत पुर्याई फिर्ता दिनु भनी शुरु जि.अ.मा लेखी पठाउनु का.जि.अ.त.मा लगत दिनु । माथि इन्साफ खण्डमा लेखिए बमोजिम हुने हुँदा यस अदालतमा पुनरावेदन गर्दा प्रतिवादी केशरकुमारी पाण्डेले राखेको कोर्टफी रु.२६५।८४ वादीहरूबाट भराई पाउँ भनी प्रतिवादीले कानुनका म्यादभित्र निवेदन परेमा वादीहरूबाट प्रतिवादीलाई भराई दिनु भनी शुरु जि.अ.मा.लेखि पठाउन का.जि.अ.त.मा लगत दिनु । माथि इन्साफ खण्डमा लेखिए बमोजिम हुने हुँदा तायदातीबाट मुकुन्दको विवाह खर्च रु.३२७१।९५ परसारी बाँकी सम्पत्तिमा ७ भागको ५ भाग वादीहरूबाट कानुन बमोजिम बण्डा छुट्याई दिनु भनी शुरु धादिङ जिल्ला अदालतमा लेखी पठाई दिनु भनी म.क्षे.अ.ले शुरु अदालतमा लेखी लगत कायम राख्ने गरेको लगत कायम राख्नु परेन । उक्त लगत कट्टी गरी दिनु भनी शुरु जि.अ.मा लेखी पठाउन का.जि.अ.त.मा लगत दिनु । माथि इन्साफ खण्डमा लेखिए बमोजिम आँशिक उल्टी हुँदा फिराद गर्दा राखेको कोर्टफी रु.२५।– पुनरावेदन गर्दा म.क्षे.अ.मा राखेको कोर्टफी रु.२५।– र तायदाती दाखिल भएपछि तायदाती बमोजिमको रु.१७४७।२७ समेत जम्मा रु.१७९७।२७ प्रतिवादी विष्णुप्रसाद र केशरकुमारीबाट बराबरका दरले भराई पाउँ भनी कानुन बमोजिम निजहरूले दर्खास्त दिन आएमा कानुनको रीत पुर्याई भराई दिनु भनी म.क्षे.अ.ले शुरु जि.अ.लाई लेखी पठाएको लगत कट्टी गरी प्र.केशरकुमारीबाट वादीले भराउन नपाउँने हुँदा विष्णुप्रसाद पाण्डेबाट मात्र भराई पाउँ भनी कानुन बमोजिम वादीहरूले दर्खास्त दिन आएमा कानुनको रीत पुर्याई भराई दिनु भनी शुरु जि.अ.मा लेखी पठाउन का.जि.अ.त.मा लगत दिनु । माथि इन्साफ खण्डमा लेखिए बमोजिम वादीहरूले प्रतिवादी केशरकुमारीबाट अंश नपाउँने हुँदा निजको पति स्व.देवप्रसादको नाउँको चल अचल सम्पत्ति बाहेक अरु सबै वादी प्रतिवादीको नाउँको चल अचल सम्पत्ति पिता तथा पति विष्णुप्रसाद पाण्डेले पेश गरेको मिति ०४१।३।४।१ को तायदातीमा उल्लेख भएको निम्नानुसारको चल अचल सम्पत्तिबाट ६ भागको ५ भाग वादीहरूले प्रतिवादी विष्णुप्रसादकोबाट अंश छुट्याई पाउँ भनी दर्खास्त दिएमा कानुनको रीत पुर्याई अंशण्डा छट्याई दिनु भनी शुरु जि.अ.मा लेखी पठाउन का.जि.अ.त.मा लगत दिनु ।
(१) विष्णुप्रसादको नाममा धा.जि.नौविसे गा.पं.वार्ड नं. ५(क) को .कि.नं.९१ को रोपनी ३–८–११–३ को प्रचलित मूल्य रु.१५००।–
(२) विष्णुप्रसादको नाउँको धा.जि.नौविसे गा.पं.वार्ड नं. ५(घ) को कि.नं.१४ को रोपनी ०–८–१–१ को प्रचलित मूल्य रु.१६०।–
(३) ऐ.का नाउँको धा.जि.नौविसे गा.पं.४(क) को कि.नं.१९१ को रोपनी ०–३–०–२ को प्रचलित मूल्य रु.१२०।–
(४) ऐ.का नाउँको धा.जि.नौविसे गा.पं.वार्ड नं. ४(क) को कि.नं.२०२ को रोपनी ०–८–०–३ जग्गा र त्यसमा बनेको लम्बाई १५, चौडाई ११ हातको पश्चिम मोहडाको २ तले टायल छाना ढुङ्गाको गाह्रो बारदली समेत भएको घर एकको प्रचलित मूल्य रु.१,५००।–
(५) ऐ.का नाउँको धा.जि.नौविसे गा.पं.वार्ड नं. ४(क) को कि.नं.१०८ को रोपनी १–२–३–२ को प्रचलित मूल्य रु.१२०।–
(६) ऐ.का नाउँमा धा.जि.गा.पं.नौविसे वार्ड नं. ४(च) को कि.नं.२०१ को रोपनी ०–११–२–२ को प्रचलित मूल्य रु.१३०।–
(७) ऐ.का नाउँको धा.जि.नौविसे गा.पं.वार्ड नं. ४(क) को कि.नं.४६७ को मोही लागेको रोपनी १–३–०–३ जग्गाको प्रचलित मूल्य रु.१३०।–
(८) नन्दप्रसाद, मोदराज, विष्णुप्रसाद, मालती खड्गप्रसाद समेत ६ जनाको नाउँमा साझा दर्ता भएको धा.जि.नौविसे गा.पं.वार्ड नं. ४(क) को कि.नं.४६२ को रोपनी २–१३–३–० मा दामासाहीले विष्णुप्रसादको भागमा पर्ने रोपनी ०–९–२२/५ को प्रचलित मूल्य रु.१२०।–
(९) ऐ.६ जनाका नाममा साझा दर्ता भएको धा.जि.नौविसे गा.पं.४(क) को कि.नं.४०२ को १–९–२–२ मा दामासाहीले विष्णुप्रसादका भागमा पर्न आउने रोपनी ०–५–०–५ जग्गाको प्रचलित मूल्य रु.११०।–
(१०) विष्णुप्रसाद, नन्दप्रसाद र खड्गप्रसाद समेत जना ३ को नाममा साझा दर्ता भएको धा.जि.नौविसे गा.पं.वार्ड नं. ४(क) को कि.नं.१२६ को रोपनी ०–१४–०–० मा दामासाहीले विष्णुप्रसादको भागमा पर्न आउने ०–४–२–२२/३ जग्गाको प्रचलित मूल्य रु.१,१००।–
(११) पुण्यप्रसाद, मेगनाथ पद्मप्रसाद र विष्णुप्रसादको साझा दर्ता भएको धा.जि.नौविसे गा.पं.वार्ड नं. ४(क) को कि.नं.१२७ को रोपनी १–९–२–२ मा दामासाहीले विष्णुप्रसादको भागमा पर्न आउने ०–६–१–२½ जग्गाको प्रचलित मूल्य रु.१८०।–
(१२) विष्णुप्रसाद, पद्मप्रसाद मेघनाथ र गोविन्दप्रसादले साझा दर्ता भएको धा.जि.नौविसे गा.पं.वार्ड नं. ४(क) को कि.नं.२४३ को रोपनी १–८–०–३ मा दामासाहीले विष्णुप्रसादको भागमा पर्न आउने ०–६–१– २½ जग्गाको प्रचलित मूल्य रु.११००।–
(१३) विष्णुप्रसादका बाबु कृष्णानन्दले फार्से गरी लिएको र निजकै नाउँ दर्ता भएको मौजा थानकोट सतुङ्गोल चम्पाडोलको ५ रोपनी जग्गा ५ जना अंशियारको बीचमा अंशबण्डा हुँदा प्रत्येकलाई १ रोपनीका दरले १ भाग लगाई विष्णुप्रसादका भागमा परेको र विष्णुप्रसादका नाउँबाट समेत चलेको उक्त ५ रोपनी जग्गा गोविन्दप्रसादले आफ्नो एकलौटी हो भनी दावी गरे तापनि हाल नापी हुँदा सगोल गा.पं.वार्ड नं. ९(ख) को कि.नं.१५४ मा रोपनी २–६–३–० र कि.नं. १५६ मा रोपनी ४–१३–०–० जग्गा रोपनी ७–३–३–० कायम भएको जग्गामा दामासाहीले मेरो भागमा पर्न आउने १–७–२२/५ जग्गाको प्रचलित मूल्य रु.१४००।–
(१४) विष्णुप्रसादका नाउँमा मकवानपुर जिल्ला हाडी खोला गा.पं.वार्ड नं. ५ को कि.नं.१७३ को विगहा ०–१२–१७ को प्रचलित मूल्य रु.२०००।–
(१५) विष्णुप्रसादका नाउँमा ऐ.को र कि.नं. १७४ के विगहा ०–९–१–१६१/९ र सो जग्गामा बनेको ९११ को फुसको १ तले घर समेतको प्रचलित मूल्य रु.११००।–
(१६) दामोदरप्रसादका नाउँमा दर्ता भएको धा.जि. नौविसे गा.पं.वार्ड नं. ५(क) को कि.नं.९३ को रोपनी २–१५–०–३ को प्रचलित मूल्य रु.१५००।–
(१७) ऐ.को नाउँमा दर्ता भएको ऐ.वार्ड नं. ४(घ) को कि.नं.५९ को रोपनी ०–९–१–३ को प्रचलित मूल्य रु.१५०।–
(१८) ऐ.को नाउँमा दर्ता भएको ऐ.वार्ड नं. ४(च) को कि.नं.१७४ को रोपनी ३–०–३–२ को प्रचलित मूल्य रु.१३०।–
(१९) ऐ.को नाउँमा दर्ता भएको ऐ.वार्ड नं. ४(क) को कि.नं.५० को रोपनी १–२–२–३ को प्रचलित मूल्य रु.१३०।–
(२०) सूर्यप्रसादको नाउँमा दर्ता भएको ऐ.वार्ड नं. ४(घ) को कि.नं.४४ को रोपनी ३–११–३–० को प्रचलित मूल्य रु.३०००।–
(२१) ऐ.को नाउँमा दर्ता भएको ऐ.वार्ड नं. ४(क) को कि.नं.२१६ को रोपनी ०–५–०–१ को प्रचलित मूल्य रु.१५०।–
(२२) ऐ.को नाउँमा दर्ता भएको ऐ.वार्ड नं. ४(क) को कि.नं.२१९ को रोपनी १–९–१–१ को प्रचलित मूल्य रु.११००।–
(२३) ऐ.को नाउँमा दर्ता भएको ऐ.वार्ड नं. ४(च) को कि.नं.२१२ को रोपनी २–४–२–० को प्रचलित मूल्य रु.१५०।–
(२४) ऐ.को नाउँमा दर्ता भएको ऐ.वार्ड नं. ४(क) को कि.नं.५३ को रोपनी ११–९–१–० को प्रचलित मूल्य रु.१५०।–
(२५) श्रीधर राजको नाममा दर्ता भएको ऐ.वार्ड नं.५(क) को कि.नं.५५ को रोपनी ३–६–३–२ को प्रचलित मूल्य रु.१०००।–
(२६) ऐ.को नाउँमा दर्ता भएको ऐ.वार्ड नं. ४(घ) को कि.नं.३० को रोपनी ०–९–२–१ को प्रचलित मूल्य रु.१५०।–
(२७) ऐ.को नाउँमा दर्ता भएको ऐ.वार्ड नं. ४(क) को कि.नं.१०८ को रोपनी ३–४–०–१ को प्रचलित मूल्य रु.११००।–
(२८) ऐ.को नाउँमा दर्ता भएको ऐ.वार्ड नं. ४(च) को कि.नं.१७० को प्रचलित मूल्य रु.११००।–
(२९) ऐ.को नाउँमा दर्ता रहेको ऐ.वार्ड नं. ४(च) को कि.नं.१८३ को रोपनी १–३–२–० को प्रचलित मूल्य रु.१४०।–
(३०) ऐ.का नाउँमा दर्ता रहेको ऐ.वार्ड नं. ४(क) को कि.नं.८३ को रोपनी १–८–३–२ को प्रचलित मूल्य रु.११५।–
(३१) मुकुन्दराजका नाउँमा दर्ता भएको ४(घ) को कि.नं.४५ को रोपनी ०–८–०–३ को प्रचलित मूल्य रु.११००।–
(३२) ऐ.को नाउँमा दर्ता रहेको ऐ.वार्ड नं. ४(क) को कि.नं.१०३ को रोपनी २–५–०–२ को प्रचलित मूल्य रु.१५०।–
(३३) ऐ.को नाउँमा दर्ता भएको ऐ.वार्ड नं. ४(च) को कि.नं.४९ को रोपनी १–५–०–० को प्रचलित मूल्य रु.१२५।–
(३४) ऐ.को नाउँमा दर्ता भएको ऐ.वार्ड नं. ४(च) को कि.नं.५१ को रोपनी ३–१३–३–१ को प्रचलित मूल्य रु.१५०।–
(३५) ऐ.को नाउँमा दर्ता भएको ऐ.वार्ड नं. ४(च) को कि.नं.१८४ को रोपनी १–५–०–१ को प्रचलित मूल्य रु.१००।–
(३६) दामोदरप्रसाद र श्रीधर राजको संयुक्त नाममा दर्ता भएको ऐ.वार्ड नं. ५(ख) को कि.नं.२७० को रोपनी २१–८–१–२ को प्रचलित मूल्य रु.१२००।–
चल धनमाल
१. किटको कराई १ को मूल्य रु.१०।–
२. सिलेवरको थाल गोटा ४ को प्रति एकको मूल्य रु.५ ले रु.२०।–
३. सिलेवरको कचौरा थान ४ प्रत्येकको रु.२ ले रु.८।–
४. सिलेवरको अम्खोरा थान ५ प्रत्येकको रु.६ ले रु.३०।–
५. सिलेवरको लोटा थान २ प्रत्येकको रु.३ ले रु.६।–
६. सिलेवरको डेक्ची थान २ प्रत्येकको रु.१५ ले रु.३०।–
७. पितले हतर सानो थाल १ को रु.२०।–
८. फलामको ताप्के थान १ को रु.५।–
९. डाडु सिलवरको थान १ को रु.५।–
१०. पन्यौ सिलवरको थान १ को रु.५।–
नियम बमोजिम मिसिल बुझाइदिनू
उक्त रायमा म सहमत छु ।
न्या. गजेन्द्रकेशरी बास्तोला
इति सम्वत् २०४३ साल श्रावण १९ गते रोज १ शुभम् ।