निर्णय नं. २८८५ - उत्प्रेषण
निर्णय नं. २८८५ ने.का.प. २०४३ अङ्क १०
संयुक्तइजलास
माननीय न्यायाधीश श्री पृथ्वीबहादुर सिंह
माननीय न्यायाधीश श्री प्रचण्डराज अनिल
सम्वत् २०४२ सालको रि.नं. १६२७
आदेश भएको मिति : २०४३।१०।२६।२ मा
निवेदक : का.न.पं.वार्ड नं. १० बस्ने देवराज अधिकारी
विरुद्ध
विपक्षी : श्री बागमती अञ्चलाधीशको कार्यालयसमेत
विषय : उत्प्रेषण
(१) निवेदन लेखाई बमोजिम कागज नगराइएको भन्ने लिखितजवाफ आएको र यदि निवेदन लेखाई बमोजिम कागज गराएको भए पनि गराइएको कागजको कानुनी मान्यता समेत नहुने ।
(प्रकरण नं. ११)
निवेदकतर्फबाट : विद्वान अधिवक्ता श्री शिवराज अधिकारी
विपक्षीतर्फबाट : विद्वान अतिरिक्त न्यायाधिवक्ता श्री भैरवप्रसाद लम्साल
आदेश
न्या.पृथ्वीबहादुर सिंह : नेपालको संविधानको धारा १६।७१ अन्तर्गत पर्न आएको प्रस्तुत रिट निवेदनको संक्षिप्त तथ्य तथा निवेदन जिकिर यसप्रकार रहेछ ।
२. विपक्षी मध्येका जि.प्र.का.का प्रहरी जवान, विपक्षी शा.अ.ले सही गरेको पत्र लिई बोलाउन आई ०४२।५।२३ गते विपक्षी सहायक अञ्चलाधीश समक्ष लगियो । सहायक अञ्चलाधीशले तपाइले जीवरत्न शाक्यको जग्गा बकसपत्र गरी लिएपछि किन पैसा दिनु भएन तुरुन्त २५,०००।– थप दिनुहोस् भन्दा मैले विपक्षीसंग बकसपत्र गरी जग्गा लिँदा कानुनले पैसा दिनु पर्ने छैन । कागज गरेको भए सक्षम निकाय समक्ष नालेश दिन पाउने हक हुने हुँदा दिनु छैन भन्ने मौखिक बयान दिएकोमा विपक्षी शा.अ.ले लेखवद्ध गरे । त्यसपछि सोही दिन २०४२।६।३ गते थप रुपैयाँ लिई आउन भनी तारेख पर्चामा सही गराई छुट्कारा दिनु भयो । तोकेको तारेखका दिन जाँदा विपक्षी कार्यालयका प्रहरी जवान सहायक अञ्चलाधीश, विपक्षी शाखा अधिकृत सबैले कार्यालय छुटेपछि एक बन्द कोठामा लगी शाखा अधिकृत कागज लेख्ने अञ्चलाधीश भन्ने गरी कागज तयार गरी सही गर र ०४१।६।६ गते नपुग पैसा २५,०००।– लिएर आइज भनी आदेश दिई नमाने थुनामा राख्ने धम्की दिई सही गराए ।
३. विपक्षी कार्यालयबाट त्यस्तो कागज गराउन पाउने अधिकार कानुनले दिएको नहुँदा अ.बं.३५ ले बदरभागी छ । विपक्षी कार्यालयका सहायक अञ्चलाधीशले ०४२।६।६ गते दिएको तारेखमा हाजिर हुन नगई सम्मानीत अदालतको शरणमा आएको छु विपक्षी कार्यालयको मलाई बोलाउने, कागज गराउने, तारेख दिने उजूरी लिने र रु.२५,०००।– लिएर आउ भनी आदेश गर्नु कानुनी प्रतिकूल हुँदा मेरो मौलिक हकमा कुण्ठा उत्पन्न गरेकोले उक्त काम कारवाही उत्प्रेषणको आदेशद्वारा बदर गरी तारेखमा राख्ने, पैसा माग्ने कार्य नगर्न भनी प्रतिषेधको आदेश जारी गरिपाउँ भन्ने समेतको रिट निवेदन जिकिर ।
४. विपक्षीहरूबाट लिखितजवाफ लिने भन्ने समेत यस अदालतको सिंगलबेञ्चको आदेश भई प्राप्त लिखितजवाफको व्यहोरा यसप्रकार छ ।
५. निवेदकको लेखाई अनुसार यस कार्यालयबाट निजको कुनै कागज गरे गराएको होइन । रिट निवेदन खारेज गरी पाउँ भन्ने समेतको बागमती अञ्चलाधीश कार्यालयको लिखितजवाफ ।
६. निवेदकले उल्लेख गरे अनुसारको कुरा यस कार्यालयलाई जानकारी नभएको र प्रहरी खटाएको समेत नहुँदा रिट निवेदन खारेज गरी पाउँ भन्ने समेतको जि.प्र.का.काठमाडौंको लिखितजवाफ ।
७. नियम बमोजिम पेशी सूचीमा चढी पेश हुनआएको प्रस्तुत रिट निवेदनमा निवेदक तर्फबाट रहनु भएका विद्वान अधिवक्ता श्री शिवराज अधिकारीले र विपक्षी कार्यालय तर्फबाट उपस्थित विद्वान अतिरिक्त न्यायाधिवक्ता श्री भैरवप्रसाद लम्सालले गर्नुभएको बहस समेत सुनियो ।
८. अब यो निवेदनमा निवेदकका माग बमोजिमको आदेश जारी गर्न मिल्ने नमिल्ने के रहेछ भन्ने कुराको निर्णय दिनु परेको छ ।
९. निर्णयतर्फ विचार गर्दा यसमा विपक्षी बागमती अञ्चलाधीश कार्यालयमा सहायक अञ्चलाधीश समेतले मलाई उपस्थित गराई जीवरत्न शाक्यलाई २५,०००।– दिन ल्याउनु भनी तारेखमा राखी मिति ०४२।६।३ मा डर धाक देखाई कागज गराएको अनाधिकार हुँदा बदर गरी पाउँ भन्ने समेतको रिट निवेदकको मुख्य निवेदन जिकिर देखिन आयो ।
१०. विपक्षी अञ्चलाधीश कार्यालय तर्फबाट पेश भएको लिखितजवाफ हेर्दा निवेदकसंग त्यस्तो कुनै कागज नगराएको भन्ने उल्लेख भएको र विपक्षी प्रहरी कार्यालयमा प्रस्तुत सन्दर्भमा कुनै जानकारी नभएको र प्रहरी नखटाएको भन्ने जिल्ला प्रहरी कार्यालय काठमाडौंको लिखितजवाफमा उल्लेख भएको देखियो ।
११. त्यसरी निवेदन लेखाई बमोजिम कागज नगराइएको भन्ने लिखितजवाफ आएको र यदि निवेदन लेखाई बमोजिम कागजै गराएको भए पनि त्यस्तो गराइएको कागजको कानुनी मान्यता समेत नहुने हुँदा निवेदन लेखाई बमोजिमको आदेश जारी गर्न मिलेन । प्रस्तुत रिट निवेदन खारेज हुने ठहर्छ । फायल नियम बमोजिम गरी बुझाई दिनु ।
उक्त रायमा म सहमत छु ।
न्या. प्रचण्डराज अनिल
इतिसम्वत् २०४३ साल माघ २६ गते रोज २ शुभम् ।