निर्णय नं. १३५१ - जालसाजी

निर्णय नं. १३५१ ने.का.प. २०३७

डिभिजन बेञ्च

सम्माननीय प्रधान न्यायाधीश श्री नयनबहादुर खत्री

माननीय न्यायाधीश श्री हेरम्बराज

आदेश भएको मिति :  २०३५।१।२४।१ मा

निवेदक : सरस्वती कटुवालनी

विरूद्ध

विपक्षी : श्यामबहादुर समेत

मुद्दा : जालसाजी

(१)  देवानीतर्फ जालसाजी मुद्दामा मिलापत्र गरेको हुनाले यस्तो मिलापत्र अ.बं.१८२ नं. विरूद्ध हुने ।

(प्रकरण नं. ३)

निवेदक तर्फबाट : विद्वान वरिष्ठ अधिवक्ता श्री सवज्र्ञरत्न तुलाधर

विपक्षी तर्फबाट : विद्वान वरिष्ठ अधिवक्ता श्री शम्भुप्रसाद ज्ञवाली

आदेश

          १.   जिल्ला झापा धुलाबारी गा.पं.वार्ड नं. ८ बस्ने सरस्वती कटुवालनीले चढाएको निवेदनमा मिसिल झिकी हेरी जाँची प्रतिवेदन जाहेर गर्नु भन्ने ०३४।२।१२ मा बक्स भइआएको हुकुम प्रमांगी बमोजिम अ.बं.१८२ नं. को रीत नपुर्‍याई मिलापत्र भएकोले कानुन बमोजिम मिलापत्र भएको नदेखिएको भन्ने पूर्वाञ्चल क्षेत्रीय अदालतबाट जाहेर भई गएको प्रतिवेदनमा प्रधान न्यायाधीशले हेरी ठहराई जाहेर गर्नु भन्ने बक्स भइआएको हुकुम प्रमांगी बमोजिम फौजदारी मुद्दामा देवानी सम्बन्धी कुरा उल्लेख भई मिलापत्र भएकोलाई कानुनी मान्यता दिन न्यायोचित नहुने भन्ने समेत जाहेर भई गएको प्रतिवेदन जाहेर हुँदा सम्माननीय प्रधान न्यायाधीशले जाहेर गरेको यो जाहेरी जाहेर हुँदा यसमा ऐन विरूद्धको मिलापत्र भए प्रधान न्यायाधीशले हेरी यो मिलापत्र बदर गराई पूर्वाञ्चल क्षेत्रीय अदालतबाट सो मुद्दाको मिसिल झिकी कानुन बमोजिम गरी निर्णय गर्नु भनी पूर्वाञ्चल क्षेत्रीय अदालतमा पठाउन तहाँ पठाइदिनु भन्ने श्री ५ महाराजाधिराजबाट हुकुम बक्सेको छ भनी मौसूफका विशेष जाहेरी विभागबाट ०३४।८।२७।३ मा लेखी आएअनुसार प्रतिवेदन नं. ५० मा दर्ता भई निवेदक सरस्वतीदेवी कटुवाल र विपक्षी जगतबहादुर पौडेल १, जबरबहादुर कार्की १, विष्णुप्रकाश जोशी १, पिताम्बर लम्साल १, शंकरप्रसाद आचार्य १ श्यामबहादुर कटुवाल क्षेत्री समेतको वारेस तीर्थ डंगोल रोहवरमा रही निवेदकतर्फका वरिष्ठ अधिवक्ता श्री सर्वज्ञरत्न तुलाधर र विपक्षीहरूका तर्फबाट विद्वान वरिष्ठ अधिवक्ता श्री शम्भुप्रसाद ज्ञवालीको बहस समेत सुनी विचार गर्दा यिनै निवेदक सरस्वती कटुवाललाई वादी यिनै विपक्षीहरू प्रतिवादी भएको जालसाजी मुद्दामा सुनसरी जिल्ला अदालतबाट २०२९।१२।२१।३ मा भएको मिलापत्र ऐन विरूद्धको मिलापत्र हो होइन सो कुराको नै सर्वप्रथम निर्णय दिनुपर्ने विषय हुनआएको छ ।

          २.   उक्त सरस्वतीले श्यामबहादुर समेतका नाउँमा फिराद गरेको जालसाजी मुद्दामा मिलापत्र हुँदा जालसाजीको दावी वादीले छोड्ने र त्यसको अतिरिक्त प्रतिवादी मध्येका जगतबहादुरले निवेदन सरस्वती कटुवालनीसँग भरी पाउने ठहरेको बिगो रु.३२,७३०।८३ उक्त मुद्दामा श्यामबहादुरले जगतबहादुरलाई तिरी दिने र सरस्वती कटुवालनीका नाउँको जग्गा बिगहा ७–४–५ श्यामबहादुरलाई राजीनामा गरी दिने शर्तमा मिलापत्र गरे भएको देखियो ।

          ३.   श्यामबहादुरले जगतबहादुर, सरस्वतीलाई रूपैयाँ दिई सरस्वतीले श्यामबहादुरलाई जग्गा राजीनामा गरी दिने भनी देवानीतर्फ जालसाजी मुद्दामा मिलापत्र भएको र जगतबहादुरले प्रतिवादी श्यामबहादुरसँग लिने भनी प्रतिवादीको बीचमा शर्त गरेको देखिएको मुद्दा परेको बाहेकैको मिलापत्र गरेको हुनाले यस्तो मिलापत्र अ.बं.१८२ नं. को विरूद्ध हुन्छ उक्त ऐनले दुवै थर झगडीयालाई सम्झाई बुझाई गर्नुपर्ने भनी गरेको मिलापत्रको सिर व्यहोराबाट नदेखिएकोले त्यस्तो ऐन विरूद्धको मिलापत्र बदर हुन्छ, निजहरूबाट आएको बक्सौनी असूल भएको भए कानुनको रीत पुर्‍याई फिर्ता दिनु र माथि लेखिएको हुकुम प्रमांगी अनुसार पूर्वाञ्चल क्षेत्रीय अदालतबाट सो मुद्दाको मिसिल झिकी कानुन बमोजिम गरी निर्णय गर्नु भनी पूर्वाञ्चल क्षेत्रीय अदालतमा उपस्थित पक्षलाई तारेख तोकी प्रमाण निमित्त आएको मिसिलमा यो आदेशको प्रतिलिपि राखी पूर्वाञ्चल क्षेत्रीय अदालतमा पठाइदिनु ।

 

न्यायाधीश प्रधान न्यायाधीश

 

इति सम्वत् २०३५ साल बैशाख २४ गते रोज १ शुभम् ।