निर्णय नं. २४५४ - उत्प्रेषण, परमादेश वा अन्य उपुयक्त आज्ञा, आदेश जारी गरिपाउँ

निर्णय नं. २४५४    ने.का.प. २०४२      अङ्क ८

 

डिभिजन बेञ्ज

इजलाश

माननीय न्यायाधीश श्री धनेन्द्र बहादुर सिंह

माननीय न्यायाधीश श्री महेशरामभक्त माथेमा

सम्वत् २०४१ सालको रि.नं. १८३९

विषय : उत्प्रेषण, परमादेश वा अन्य उपुयक्त आज्ञा, आदेश जारी गरिपाउँ ।

 

निवेदक      : जिल्ला काठमाडौं का.नगर पंचायतवार्ड नं.५ विशालनगर हाँडी गाँउ बस्ने नेपाल विद्युत कर्पोरेशन केन्द्रीय कार्यालय काठमाडौंको क्लर्क सहायक स्तर तृतीय श्रेणीमा कार्यरत हरी गोपाल प्रधान ।

विरुद्ध

विपक्षी :पदपूर्ति तथा बढुवा समिति नेपाल विद्युत कर्पोरेशन केन्द्रीय कार्यालय काठमाडौं ।

नेपाल विद्युत कर्पोरेशन पाटन डिभिजनमा सहायक तृतिया श्रेणीमा कार्यरत कृष्णमोहन जोशी ।

आदेश भएको मिति:२०४२।८।३।२ मा

     बढुवाको प्रथमपटक नामावली प्रकाशित भएको मितिले ९० दिन नघाई बढुवा नामावली संशोधन गर्ने निर्णय गरेको र प्रत्यर्थी पदपूर्ति बढुवा समितिबाट गोरखापत्रमा मिति ०४१।१०।२३ मा प्रकाशित भएको संशोधित नामावली सूचना समेत उक्त सामान्य सिद्धान्तले गरेको व्यवस्थाको विपरीत भई त्रुटिपूर्ण देखिएकाले सो निर्र्णय सूचनालाई मान्यता दिन नमिल्ने ।

(प्रकरण नं. १२)

निवेदक तर्फबाट: विद्वान अधिवक्ता श्री गोपाल प्रसाद भण्डारी

विपक्षी तर्फबाट      : विद्वान अधिवक्ता श्री मिथिलेश कुमार सिंह

उल्लेखित मुद्दाःX

आदेश

न्या.धनेन्द्र बहादुर सिंहः पदपूर्ति तथा बढुवा समिति नेपाल विद्युत कर्पोरेशन केन्द्रीय कार्यालय काठमाडौंको मिति ०४१।१०।२३ को बढुवाको सूचना समेत बदर गरिपाउँ भनी नेपालको संविधान, २०१९ को धारा ७१ अन्तर्गत पर्न आएको प्रस्तुत रिट निवेदनको संक्षिप्त विवरण यसप्रकार छ ।

२.    म निवेदक नेपाल विद्युत कर्पोरेशन केन्द्रीय कार्यालयको क्लर्क सहायक तृतीय श्रेणीमा नियुक्त भई कार्यरत छु । प्रत्यर्थी पदपूर्ति तथा बढुवा समिति नेपाल विद्युत कर्पोरेशन केन्द्रीय कार्यालय काठमाडौंको मिति ०४०।९।१९ मा प्रकाशित भएको विज्ञापन नं. १२।०४० को सूचना अनुसार जुनियर असिष्टेण्ट, जुनियर एकाउण्टेन्ट वा सो सरहको प्रशासन तथा लेखासेवाको सहायकस्तर द्वितीय श्रेणीको पदमा बढुवाको दर्खास्त आहृवान गरिएकोमा म निवेदक समेत सम्भाव्य उम्मेदवार भएकोले फाराम भरेको प्रत्यर्थी बढुवा समितिले गोरखापत्रमा मिति ०४१।२।१५ मा प्रकाशित गरिएको बढुवाको नतिजा सम्बन्धी सूचनामा बढुवा गरिएका जम्मा १४ जना व्यक्तिमध्ये म निवेदकको नाम बढुवाको योग्यता क्रममा पाँचौं स्थानमा थियो । तर प्रत्यर्थी बढुवा समितिले मिति ०४१।१०।२३ मा गोरखापत्रमा प्रकाशित गरेको संशोधित नामावलीमा मेरो नाम हटाई प्रत्यर्थी कृष्णमोहन जोशीको नाम समाविष्ट भएको रहेछ । उक्त सूचनामा निवेदकको नाम किन हटाइयो उल्लेख छैन । संस्थानमा नियुक्ति, बढुवा र विभागीय कारवाही सम्बन्धी सामान्य सिद्धान्तको परिच्छेद ९ को दफा १ को प्रयोजनको लागि गो.प.मा प्रत्यर्थी बढुवा समितिको बढुवाको नतिजा सम्बन्धी सूचना ०४१।२।१५ मा प्रकाशित भएको छ उक्त बढुवामा चित्त नबुझ्ने कर्मचारीले उक्त सामान्य सिद्धान्तको परिच्छेद ९ को दफा २ अनुसार बढुवा नामावली प्रकाशित भएको मितिले ३५ दिन भित्र उजूर गरेको भए उक्त सिद्धान्तको उक्त परिच्छेदको दफा ३ अनुसार नामावली प्रथमपटक प्रकाशित भएको मितिले ९० दिनभित्र अर्थात् ०४१।५।९ मा बढुवाको संशोधित नामावली प्रत्यर्थी बढुवा समितिले प्रकाशित गर्नुपर्ने बाध्यात्मक व्यवस्था छ उक्त व्यवस्थाको पालना भएको छैन । जसबाट उक्त मिति ०४१।१०।२३ को संशोधित नामावली सूचना गैरकानुनी छ । अतः बढुवा सम्बन्धी पालन गर्नुपर्ने सिद्धान्त विपरीत गर्ने गरेको प्रत्यर्थी बढुवा समितिको प्रत्यर्थी कृष्णमोहन जोशीको नाम बढुवा नामावलीमा समावेश गर्ने गरेको निर्णय र सो अनुसारको सूचना समेत गैरकानुनी भई त्रुटिपूर्ण हुँदा उत्प्रेषणद्वारा बदर गरी मेरो उक्त बढुवा सुरक्षित गरी हक प्रचलन गराई पाउँ र रिट निवेदनको अन्तिम निर्णय नभएसम्म प्रत्यर्थीको उक्त सूचना अनुसारको काम कार्य नगर्नु भन्ने अन्तरिम आदेश समेत जारी गरिपाउँ भन्ने समेत हरिगोपाल प्रधानको मिति ०४१।११।३ को रिट निवेदन जिकिर ।

३.    विपक्षीहरूबाट लिखिन जवाफ मगाई पेशगर्नु भन्ने यसअदालत सिंगल बेञ्जको मिति ०४१।११।९ को आदेश ।

४.    २०४१।२।१५ गते यस कर्पोरेशनको सूचनामा रिट निवेदकको नाम प्रकाशित भएको थियो । यो बढुवा जुनियर अफिस असिष्टेण्ट जुनियर एकाउन्टेण्टको लागि थियो कृष्णमोहन जोशी ०३०।३।१ मा स्थायी क्लर्क हुनुभएको र बि.ए.पास गर्नु भएको र रिट निवेदक ०३०।८।२६ देखि स्थायी क्लर्क भएको बि.ए.पास गर्नु भएको छ । कृष्णमोहन जोशीलाई अघि २१७.६६ नम्बर दिइएको र बि.ए.को नम्बर छुट भएकोले पछि बि.ए.  को नम्बर १६ थप्दा जम्मा २३३.६६ नम्बर पुगेको रिट निवेदक १।६।२१ असाधारण विदा लिएको रहेछ सो बापत १२.४५ नम्बर कट्टा गर्दा रिट निवेदकको नाम योग्यताक्रमको सूचीबाट हटाउने मिति ०४१।९।२ गते संचालक समितिबाट भएको हो र स्वयं रिट निवेदककै गल्तीबाट ९० दिन भित्रमा निर्णय हुन नसकेको हो रिट निवेदकको माग बमोजिम आदेश जारी हुनुपर्ने नहुँदा रिट निवेदन खारेज गरिपाउँ भन्ने समेत पदपूर्ति तथा बढुवा समिति नेपाल विद्युत कर्पोरेशन केन्द्रीय कार्यालय काठमाडौंको मिति ०४१।१२।७ को लिखिन जवाफ ।

५.    म कृष्णमोहन जोशी समेतको नाम बढुवा सूचीमा समाविष्ट गरी दोस्रोपटक संशोधित नामावली प्रकाशित गरेको लो.से.आ.को सामान्य सिद्धान्त एवं कानुन बमोजिम नै भएको हुँदा सो निर्णय र सूचना बदर हुनुपर्ने होईन अतः रिट निवेदन खारेज गरिपाउँ भन्ने समेत विपक्षी कृष्णमोहन जोशीको मिति ०४२।१।१७ को लिखिन जवाफ ।

६.    रिट निवेदक तर्फबाट रहनुभएका विद्वान अधिवक्ता श्री गोपालप्रसाद भण्डारीले प्रथमपटक रिट निवेदक समेतको नाम समाविष्ट गरी प्रकाशित भएको मिति ०४०।९।१९ को बढुवा सूचना उपर उजूर परेपछि प्रथमपटक सूचना प्रकाशित भएको ९० दिन नघाई बढुवा उजूरीको निर्णय गरेको र मिति ०४१।१०।२३ मा दोश्रो संशोधित नामावली प्रकाशित गर्ने गरेको नामावली सूचना समेत त्रुटिपूर्ण हुँदा उक्त निर्णय सूचना समेत उत्प्रेषणको आदेशद्वारा बदर गरी रिट निवेदकको बढुवा सुरक्षित हुनुपर्छ भन्ने र प्रत्यर्थी पदपूर्ति तथा बढुवा समिति नेपाल विद्युत कर्पोरेशन केन्द्रीय कार्यालय काठमाडौंको तर्फबाट रहनुभएका विद्वान अधिवक्ता श्री मिथिलेशकुमार सिंहले विपक्षी रिट निवेदकको नाम प्रथम बढुवा सूचनामा प्रकाशित भए पनि सो उपर उजूर परेपछि बढुवा अंकको टोटल गर्दा रिट निवेदकको जम्मा अंक २१७.३१ र कृष्णमोहन जोशीको २३३.६६ अंक भई रिट निवेदक भन्दा बढी पाउने कृष्णमोहन जोशीलाई बढुवा नामावलीमा समाविष्ट गरी मिति ०४१।१०।२३ मा दोश्रो संशोधित नामावली प्रकाशित गर्ने गरेको बढुवा समितिको निर्णय सूचना कानुन सिद्धान्त अनुकूल हुँदा रिट निवेदन खारेज हुनुपर्छ भन्ने समेत बहस प्रस्तुत गर्नुभयो ।

७.    प्रस्तुत मुद्दामा रिट निवेदकको माग बमोजिमको आदेश जारी हुनुपर्ने हो वा होइन? सो कुराको निर्णय दिनुपर्ने हुन आएको छ ।

८.    यसमा निर्णयतर्फ हेर्दा प्रथमपटक बढुवा नामावली मिति ०४१।२।१५ मा गोरखापत्रमा प्रकाशित भएकोमा सो सूचना उपर विपक्षी कृष्णमोहन जोशीको उजूरी परेकोमा पहिलो नामावाली प्रकाशन भएको मितिले ९० दिनभित्र सो उजूरी सम्बन्धमा निर्णय गरी दोश्रो संशोधित नामावली प्रकाशित गर्नुपर्नेमा सो म्याद ९० दिन नघाई निर्णय गरी प्रत्यर्थी पदपूर्ति तथा बढुवा समितिबाट मिति ०४१।१०।२३ मा गो.प.मा प्रकाशित गरेको दोश्रो संशोधित नामावली सूचना समेत त्रुटिपूर्ण हुँदा उक्त निर्णय सूचनाहरू बदर गरिपाउँ भन्ने रिट निवेदकको मुख्य जिकिर छ ।

९.    प्रत्यर्थी पदपूर्ति तथा बढुवा समिति नेपाल विद्युत कर्पोरेशन केन्द्रीय कार्यालय काठमाडौंको लिखिन जवाफ हेर्दा उक्त लिखिन जवाफमा ९० दिनभित्र निर्णय गर्नुपर्ने होइन भनी वा ९० दिनभित्र निर्णय भएको छ भनी उल्लेख गर्न सकेको छैन । उक्त लिखिन जवाफको प्रकरण ७ मा रिट निवेदककै गल्तीबाट ९० दिनभित्रमा निर्णय हुन नसकेको हो भन्ने उल्लेख भएको पाइन्छ ।

१०.    प्रत्यर्थी समितिबाट बढुवा सम्बन्धमा अपनाएको लोकसेवा आयोगबाट प्रकाशित संस्थानमा नियुक्ति, बढुवा र विभागीय कारवाही सम्बन्धी सामान्य सिद्धान्त २०३५ को परिच्छेदको (३) मा बढुवा नामावली संशोधन उजूरी सुन्ने अधिकारीले उजूरी उपर कारवाही गर्दा प्रकाशित नामावलीमा संंशोधन गर्नुपर्ने     कारण देखेमा नामावली संशोधन निमित्त बढुवा समितिलाई सूचना गर्नु पर्नेछ र त्यसरी सूचना पाएपछि बढुवा समितिले सूचना अनुसार नामावली पहिलोपटक प्रकाशन भएको मितिले ९० दिनमा ननघाई संशोधित नामावली पुनः प्रकाशित गर्नु पर्नेछ भन्ने व्यवस्था गरेको पाइन्छ ।

११.    यसबाट कुनै बढुवाको निर्णय सूचना उपर उजूर परेमा प्रथमपटक नामावली प्रकाशित भएको मितिले ९० दिनभित्र उजूरी सुन्ने निकाय अधिकारीबाट अनिवार्य रुपमा निर्णय गरी संशोधित बढुवा नामावली प्रकाशित गर्नुपर्ने अनिवार्यता गरेको देखिन आयो । तर प्रस्तुत मुद्दामा प्रथमपटक बढुवा नामावली मिति ०४१।२।१५ मा प्रकाशन भएको र सो उपर प्रत्यर्थी कृष्णमोहनको उजूर परेपछि संचालक समितिबाट नामावली संशोधन गर्ने निर्णय गरी संशोधित नामावली प्रत्यर्थी पदपूर्ति तथा बढुवा समितिबाट मिति ०४१।१०।२३ मा मात्र गोरखापत्रमा प्रकाशित भएको देखिन आएबाट प्रथम नामावली प्रकाशित भएको मितिले ९० दिन नघाई संशोधित नामावली प्रकाशित गरेको देखिन आएको छ । जुन कुरालाई प्रत्यर्थी पदपूर्ति तथा बढुवा समितिले पनि आफ्नो लिखिन जवाफमा स्वीकार गरेको पाइन्छ ।

१२.   तसर्थ बढुवाको प्रथमपटक नामावली प्रकाशित भएको मितिले ९० दिन नघाई बढुवा नामावली संशोधन गर्ने निर्णय गरेको र प्रत्यर्थी पदपूर्ति बढुवा समितिबाट गोरखापत्रमा मिति ०४१।१०।२३ मा प्रकाशित भएको संशोधित नामावली सूचना समेत उक्त सामान्य सिद्धान्तले गरेको व्यवस्थाको विपरीत भई त्रुटिपूर्ण देखिएकोले सो निर्णय सूचनालाई मान्यता दिन नमिल्ने हुँदा उक्त त्रुटिपूर्ण निर्णय तथा प्रत्यर्थी पदपूर्ति तथा बढुवा समितिबाट प्रकाशित मिति ०४१।१०।२३ को संशोधित नामावली सूचना समेत उत्प्रेषणको आदेशद्वारा बदर हुने ठहर्छ । फाइल नियम बमोजिम गरी बुझाई दिनु ।

 

उक्त रायमा म सहमत छु ।

 

न्या.महेशरामभक्त माथेमा

 

इतिसम्वत् २०४२ साल मार्ग ३ गते रोज २ शुभम् ।